شوانکارێک لە سنووری سیدەکان بە تەقەی سوپای پاسداران گیانی لەدەستدا

ئاکام غەفور

لە دوێنێ نیوەڕۆوە شوانکارێک لە کوێستانەکانی برادۆست بێسەروشوێنە و ئەمشەو دەرکەوت کە لەلایەن سوپای پاسدارانی ئێرانەوە تەقەی لێ کراوە و گیانی لەدەستداوە.

شیمال هەرکی ئامۆزای گەنجە کوژراوەکە بە 964ـی وت، “ئامۆزاکەمان لە لایەن سوپای پاسداران لە کوێستانەکانی خنێرانی سنووری سیدەکان تەقەی لێ کراوە و کوژراوە”.

وتیشی، تەرمەکەی و نزیک 850 سەر مەڕ و بزن لەلایەن سوپای پاسداران بردراون بۆ ئێران و لە هەوڵی ئەوەداین تەرمەکەی وەربگرینەوە.

سەرچاوەیەکی ئەمنی بۆ 964 وتی، تەرمی ئەو گەنجە ئێستا لە شاری رەزایەیە لە ئێران.

ئەو گەنجە تەمەنی 30 ساڵە و خەڵکی ناحیەی کۆڕێی سەربە هەولێرە و رێپدانی هەبووە بۆ چون بۆ کوێستانەکان.

پێداچوونەوە: توانا نەقی