فڕۆکەی هاوپەیمانان بۆردومانی داعشیان کرد
964+
هونەر فارس – گەرمیان
کەمێک پێش ئێستا فڕۆکەی هاوپەیمانان بۆردومانی مۆڵگەکانی داعشیان لە گوندەکانی شۆڕاو و پەڵکانە کردووە لە سنووری شارۆچکەی خورماتوو.
بۆردومانەکە ئەمشەو 14.3.2023 لە رێگەی دوو فڕۆکەی جەنگییەوە کراوە.
تا ئامادەکردنی ئەم هەواڵە فڕۆکەکان بەسەر ئاسمانی سنوورەکەدا دەسووڕێنەوە.
فەرماندەیەکی سەربازیی هێزی پێشمەرگە لە سنوورەکە، زانیارییەکانی بۆ 964 پشتڕاست کردەوە و ئاماژەی بە زیادبوونی جموجوڵەکانی داعش کرد لەو شوێنانەی بۆشایی ئەمنی لێیە.
بە وتەی ئەو فەرماندەیە، “ژمارەی ئەو چەکدارانەی بە بەردەوامی لە سنوورەکەدا هاتووچۆ دەکەن 15 بۆ 20 چەکدار دەبن و خۆیان لە مۆڵگەکاندا حەشار دەدەن و هەرکات زانیارییان لەسەر ئۆپراسیۆنەکان پێبگات شوێنەکانیان دەگوازنەوە”.
تەنها لەمساڵدا لانی کەم 5 جار مۆڵگەکانی داعش لە سنوورەکانی شۆڕاو و غەڕە و پەڵکانە و ئەو شوێنانەی بۆشایی ئەمنییان تێدایە بۆردومان کراون.
پێداچوونەوە: پێشەوا محەمەد