مێردمنداڵێک گیانی لەدەست دا و سێ کەسیش بریندار بوون

+964
سیروان خورشید – دوزخورماتوو

بەرەبەیانی ئەمڕۆ شەممە 18.4.2026 لەسەر رێگای سەرەکیی کەرکوک – بەغدا لە نزیک دەروازەی خورماتوو رووداوێکی هاتووچۆ لە نێوان پیکابێک و مینی پاسێکدا روویدا کە بەهۆیەوە مێردمنداڵێکی 13 ساڵان گیانی لەدەست دا و سێ سەرنشینی دیکەش بە سەختی بریندار بوون.

ئیحسان عەباس، بەڕێوەبەری هاتووچۆ دەرەکییەکانی خورماتوو بە 964ـی وت، “رووداوەکە کاتژمێر 4:30ـی بەرەبەیان لە نزیک دەروازەی قەزای خورماتوو روویداوە، پێکدادانەکە لە نێوان پیکابێک و مینی پاسێک بووە، کاتێک مینی پاسەکە بەتیژڕەوییەوە هاتووە، پیکابەکەش بەهۆی تاریکی رێگاوە راستەوخۆ هاتووەتەسەر رێگا گشتییەکە و رووداوەکەی لێ کەوتووەتەوە”.

ئاماژەی بەوەش کرد، بەهۆی توندیی پێکدادانەکەوە ئۆتۆمبێلە پیکابەکە گڕی گرتووە، لەو کاتەدا سێ کەسی تێدابووە کە شۆفێرەکە و دوو مێردمنداڵ بوون، یەکێک لە مێردمنداڵەکان بەهۆی سەختی برینەکەی و زۆریی رێژەی سووتانەکەی، دەستبەجێ لە شوێنی رووداوەکە گیانی لەدەستداوە، هەروەها شۆفێرەکە و مێردمنداڵەکەی دیکەش لەگەڵ سەرنشینێکی مینی پاسەکە بە سەختی برینداربوون.

ئیبراهیم خالید، ئێشکگر لە نەخۆشخانەی گشتیی خورماتوو بە 964ی رایگەیاند: دوای گەیاندنی تەرمی مێردمنداڵێکی سووتاو و سێ برینداری دیکەی رووداوەکە بۆ بەشی فریاکەوتن، بەهۆی سەختیی برینەکانیانەوە و پاش وەرگرتنی چارەسەری سەرەتایی، بریندارەکان رەوانەی نەخۆشخانەی ئازادیی شاری کەرکوک کراون.

ئێستا لایەنە پەیوەندیدارەکانی هاتووچۆ لێکۆڵینەوەیان لە هۆکار و چۆنیەتی رووداوەکە دەستپێکردووە.

پێداچوونەوە: ئەرسەلان عەبدوڵا