چەند تۆمەتبارێک دەستگیرکران
پۆلیسی سلێمانی بارهەڵگرێکی دزراوی لە حاجیاوا دۆزییەوە
964+
وریا فەتاح
مەفرەزەکانی بنکەی پۆلیسی عەربەت توانییان لە ماوەی کەمتر لە 24 کاتژمێردا دەست بەسەر ئۆتۆمبێلێکی بارهەڵگری دزراودا بگرن و چەند تۆمەتبارێکیش رەوانەی دادگا بکەن.
بەپێی راگەیەندراوێکی پۆلیسی پارێزگای سلێمانی، دوای ئەوەی هاوڵاتییەک بنکەی پۆلیسی عەربەتی ئاگادارکردووەتەوە لە دزینی ئۆتۆمبێلە بارهەڵگرەکەی (جۆری فلات)، دەستبەجێ بە بڕیاری دادوەر لێکۆڵینەوە و بەدواداچوونی ورد دەستیپێکردووە.
هێزەکانی پۆلیس دوای کۆکردنەوەی زانیاریی، توانییان ئۆتۆمبێلە دزراوەکە لە سنووری ناحیەی “حاجیاوا”ی سەر بە ئیدارەی راپەڕین بدۆزنەوە و بیگەڕێننەوە بۆ ناحیەی عەربەت.
پۆلیسی سلێمانی ئاماژەی بەوەش کردووە، لەسەر ئەم رووداوە و بەپێی ماددەی (444) لە یاسای سزادان، چەند تۆمەتبارێک دەستگیرکراون و لە ئێستادا لێکۆڵینەوە لەگەڵیاندا بەردەوامە.
