لەبەر بێ كارەبایی
خەڵكی دوكان رژانە شەقامەكان و رێگای دوكان – سلێمانییان داخست
+964
ئەحمەد محەمەد – سلێمانی
بۆ سێیەمین جارە خەڵكی قەزای دوكان لەبەر نەبوونی كارەبای نیشتمانی، خۆپیشاندان دەكەن و ئەمشەویش رێگای سەرەكیی دوكان بۆ سلێمانییان داخست.
محەمەد جەلال، خۆپێشاندەرێكی دوكانە و بە 964ی وت، لەماوەی 24 كاتژمێری رابردوودا تەنیا چوار كاتژمێر كارەبایان پێداوین و لەدوێنێوە ئەوە سێیەم جارە شەقامەكە دادەخەین، كۆڵیش نادەین تا داواكارییەكەمان جێبەجێ دەكرێت.
وتیشی، بۆ قەزای دوكان كە خۆی بەرهەمهێنەری كارەبایە، ناكرێت دۆخی بەم جۆرەبێت و پێمان قبوڵ ناكرێت، چونكە ئێمە وەك شوێنەكانی دیكە بەدیلمان نییە و لەناو قەزاكەدا مۆلیدەی ئەهلی نییە.
ئاماژەی بەوەش كرد، ئێستا هەموومان هاتووینەتە بەردەم قایمقامیەتی دوكان و داوای چارەسەر دەكەین، تا كارەبامان بۆ نەگەڕێندرێتەوە شەقامەكە چۆڵ ناكەین.
964 بۆ گەیاندنی داواكاری خۆپیشاندەران، چەند جارێك هەوڵیدا و پەیوەندی بە سیروان لالە سەرحەد، قایمقامی قەزای دوكان و مەهدی عەبدولڕەحمان، بەڕێوەبەری كارەبای دوكانەوە كرد، بەڵام وەڵامی پەیوەندییەكانیان نەدایەوە.
پێداچوونەوە: ئەرسەلان عەبدوڵا
