دەنگی تەقینەوەیەکی بەهێز لە بەندەر عەباس بیسترا
ئێران رەتیدەکاتەوە فەرماندەی هێزی دەریایی وڵاتەکە تیرۆر کرابێت
964+
شۆڕش قادری
نوێکرایەوە؛ 16:00
ئاژانسی هەواڵی تەسنیمی نزیک لە سوپای پاسداران بڵاویکردووەتەوە، بەپێی ئامارە سەرەتاییەکان، لە تەقینەوەکەی بەندەر عەباسـدا کەسێک گیانی لەدەستداوە و 14 کەسی دیکەش برینداربوون.
هەواڵی سەرەتا؛
دەنگی تەقینەوەیەکی بەهێز لە شاری بەندەر عەباس لە باشووری ئێران بیسترا و میدیاکانی ئەو وڵاتەش رەتیدەکەنەوە، فەرماندەی هێزی دەریایی وڵاتەکە تیرۆر کرابێت.
پاش نیوەڕۆی ئەمڕۆ شەممە 31.1.2026 میدیاکانی ئێران بڵاویانکردەوە، تەقینەوەیەک لەناو بینایەکدا لەسەر شەقامی موعەلیمی بەندرەعەباس روویداوە و دەنگێکی بەهێزی هەبووە.
ئاماژە بەوەشکراوە، هەر دوای رووداوەکە تیمەکانی فریاگوزاری و ئاگرکوژێنەوە چوونەتە شوێنەکە و لێکۆڵینەوە لە رووداوکە دەستیپێکردووە.
هەر لەگەڵ ئەو رووداوە، ئاژانسی هەواڵی مێهر بڵاویکردووەتەوە کە دەنگۆی تیرۆرکردنی عەلیڕەزا تەنگسیری فەرماندەی هێزی دەریایی ئێران راست نییە و ناوبراو سەلامەتە.
