وەبەرهێنەرانی كوردستان 700 ملیۆن دینار دەبەخشنە رۆژئاوای كوردستان
ئەمە قۆناغی یەكەمە
وەبەرهێنەران 700 ملیۆن دیناریان بۆ رۆژئاوا كۆكردەوە
964+
ئەرسەلان عەبدوڵا
ئەو كۆمەكە داراییەی وەبەرهێنەرانی كوردستان لە رێگەی دەستەی وەبەرهێنانەوە كۆیانكردووەتەوە بۆ هاوكاری كوردانی رۆژئاوای كوردستان، بڕەكەی 700 ملیۆن دینارە، ئەمەش وەك قۆناغی یەكەمە.
سەبارەت بە كۆكردنەوەی هاوكارییەكە و گەیاندنی بە رۆژئاوا، ئێوارەی ئەمڕۆ كۆبوونەوەیەك لە دەستەی وەبەرهێنان بە ئامادەبوونی سەرۆكی دەستەكە محەمەد شوكری و پارێزگاری هەولێر ئومێد خۆشناو، هەروەها سەرۆك و جێگرانی یەكێتیی وەبەرهێنەران و نوێنەرانی دەزگای خێرخوازی بارزانی بەڕێوەچوو، هەروەك راگەیاندراوی پارێزگای هەولێر ئاماژەی پێداوە.
هەروەها هاتووە: لە كۆبوونەوەكەدا ئاماژە بەوە كراوە، ئەو 700 ملیۆن دینارە وەك قۆناغی یەكەمی هەڵمەتی كۆمەكی وەبەرهێنەرانە و لە رۆژانی داهاتوو بڕێكی دیكەی هاوكاری كۆدەكرێتەوە و لە رێگەی دەزگەی خێرخوازی بارزانییەوە دەگەیەندرێتە رۆژئاوا و بەسەر هاوڵاتیانی ئەوێ دابەش دەكرێت.
