سنوورى نێوانیان بەشێک بوو لە گفتوگۆ
سوودانی و مەزڵوم عەبدی بە تەلەفۆن قسەیان کرد؛ مەترسییەکانی داعش تەوەری سەرەکی بوو
964+
وریا فەتاح
محەمەد شیاع سوودانی، سەرۆکوەزیرانی عێراق، پەیوەندییەکی تەلەفۆنی لەگەڵ مەزڵوم عەبدی، فەرماندەی گشتیی هێزەکانی سووریای دیموکرات (هەسەدە) ئەنجامدا و پرسی زیندانیانی داعش و ئاسایشی سنوورەکانیان تاوتوێ کرد.
ئێوارەی ئەمڕۆ سێشەممە 20ـی کانوونی دووەمی 2026، نووسینگەی ڕاگەیاندنی سەرۆکوەزیرانی عێراق بڵاویکردەوە، لەو پەیوەندییەدا سوودانی و مەزڵوم عەبدی باسیان لە دوایین پێشهاتە ئەمنییەکانی سووریا و کاریگەرییەکانی ئەو دۆخە لەسەر ئاسایشی هەرێمی و ناوخۆی عێراق کردووە.
گرنگترین خاڵەکانی گفتوگۆکە:
1- مافی پێکهاتەکان و یەکپارچەیی: سوودانی جەختی لەسەر پێویستیی دەستپێکردنی گفتوگۆ لەم قۆناغە هەستیارەدا کردووەتەوە، بەجۆرێک کە مافی هەموو پێکهاتەکانی سووریا پارێزراو بێت و یەکپارچەیی خاکی ئەو وڵاتە تێکنەچێت.
2- هێڵی سوور؛ زیندانیانی داعش: سەرۆکوەزیرانی عێراق هۆشداریی داوە لەوەی نابێت ڕێگە بدرێت ئاڵۆزییەکان ببنە هۆی ڕاکردنی تیرۆریستانی داعش لە زیندانەکان، چونکە ئەوە مەترسییەکی گەورە بۆ سەر ئاسایشی عێراق، سووریا و تەواوی ناوچەکە دروست دەکات.
3- سەقامگیری سنوور: هەردوولا جەختیان لەسەر هەماهەنگی کردووەتەوە بۆ ئەوەی ڕێگری بکرێت لە هەر جۆرە یارییەک بە سەقامگیری ناوچەکە و دروستبوونی بۆشایی ئەمنی لەسەر سنوورە هاوبەشەکان.
ئەم پەیوەندییە لە کاتێکدایە کە سووریا بە قۆناغێکی نوێی سیاسی و سەربازیدا تێدەپەڕێت و عێراقیش بە وردی چاودێری دۆخی زیندانەکانی داعش دەکات کە لەژێر کۆنترۆڵی هەسەدەدان.
