دەیەوێت بە زۆر ئاوارەیان بکات
هەسەدە: دیمەشق 170 هەزار مەدەنی لە دێرحافر دەخاتە مەترسییەوە
964+
وریا فەتاح
ناوەندی راگەیاندنی هێزەکانی سووریای دیموکرات (هەسەدە)، راگەیەندراوێکی بەپەلەی لەسەر بارودۆخی شاری دێرحافر بڵاوکردەوە و تۆمەتەکانی حکومەتی سووریای رەتکردەوە.
بەپێى راگەیەندراوەکە، هەسەدە بە توندی ئەو دەنگۆیانە رەتدەکاتەوە کە گوایە رێگری لە مەدەنییەکان دەکات شارەکە چۆڵ بکەن، دەڵێت پەککەوتنی جووڵەی خەڵک بەهۆی بۆردومانی بەردەوام و کۆکردنەوەی هێزە لەلایەن سوپای سووریاوە.
” حکومەتی سووریا خۆی بڕیارى فەرمی داوە بە داخستنی هەموو دەروازەکان لەگەڵ ناوچەکانی باکوور و رۆژهەڵاتی سووریا، کەچی ئێستا بە پێچەوانەوە قسە دەکات”، هەسەدە وا دەڵێت.
هۆشداریش دەدات کە هەر هەوڵێک بۆ کۆچپێکردنی زۆرەملێی مەدەنییەکان بە زەبری هێز، بەپێی رێککەوتنامەی 4ـی جنێڤ و سیستەمی رۆما، وەک “تاوانی جەنگ” هەژمار دەکرێت.
هەسەدە داوا لە نەتەوە یەکگرتووەکان و رێکخراوە مرۆییەکان دەکات دەستوەردان بکەن، چونکە بەهۆی ئەم گرژییانەوە ژیانی زیاتر لە 170,000 مەدەنی لە مەترسیدایە، بەتایبەت لەم کەشوهەوا ساردەدا.
