بەشێک لە ماڵەکان چۆڵ کراون و کارەبای گەڕەکەکەش بڕاوە
دوای 24 کاتژمێر هێشتا دووکەڵ بەسەر کارگەکەی پیرزینەوە ماوە
964+
عەبدولعەزیز خالند – هەولێر
دووکەڵ و خۆڵەمێش هێشتا بەسەر كۆمەڵگەی پیرزینی هەولێرەوەیە، دوای تێپەڕبوونی 24 کاتژمێر بەسەر ئاگرکەوتنەوە لە کارگەیەکی دروستکردنی چپس لە پیرزین، هێشتا ئاسەوارەکانی ئاگرەکە ماوەتەوە و بەشێک لە دانیشتووانی ناوچەکەش بەهۆی ترس و دووکەڵەوە ماڵەکانیان چۆڵ کردووە.
تیمەکانی بەرگریی شارستانیی هەولێر ئاماژە بەوە دەکەن، مەترسی تەشەنەسەندنی ئاگرەکە نەماوە، بەڵام سووتانی ئەو بڕە زۆرەی نایلۆن و کارتۆنانەی لە کارگەکەدا هەبوون، وایکردووە دووکەڵێکی خەست لە ناوچەکەدا بڵاوبێتەوە، ئێستا خاوەنی کارگەکە و تیمەکان خەریکی پاککردنەوەی پاشماوەکانن، بۆ ئەوەی رێگری لە سەرهەڵدانەوەی ئاگرەکە بکەن، بە تایبەت کە کارگەکە بە تەواوی سووتاوە و تەنیا کەلاوەی لێ ماوەتەوە.
ئاگرەکە کاریگەری راستەوخۆی لەسەر ژیانی خەڵکی گەڕەکەکە هەبووە، جگە لە بڕانی کارەبای بەشێکی کۆمەڵگەی پیرزین، ئەو ماڵانەی کەوتوونەتە پشت کارگەکە بەهۆی مەترسی و دووکەڵەوە ماڵەکانیان چۆڵ کردووە، بەشێكیشیان زیانێکی کەمیان بەرکەوتووە.
پێداچوونەوە: ژێوار خدر
