خاوەن كۆگایەک لە چەمچەماڵ: زیانی ملیۆن و نیوێك دۆلارم بەركەوتووە
“كوڕەكەم ئاو بردی و خەڵک گرتیانەوە”
964+
ئەحمەد محەمەد – چەمچەماڵ
میكائیل محەمەد خاوەنی كۆگایەكی وشكەیە لە قەزای چەمچەماڵ، ئاشكرای دەكات زیانەكانی دەگاتە ملیۆن و نیوێك دۆلار، بەڵام سوپاسی خوا و خەڵك دەكات، كە كوڕەكەیان لە مردن رزگار كردووە و لە لافاوەكە نەیانهێشتووە ئاو بیبات.
میكائیل بە 964ی راگەیاند، راستە لافاو رووداوێكی سروشتییە، بەڵام بۆ ئەوەی چەمچەماڵ هۆكاریش هەیە، ئەویش دروستكردنی خانوو و ڤێلایە لەسەر رێڕەوی ئاو و دروستكردنی پڕۆژە و هەروەها كاری تەجاوزە.
خاوەن كۆگاكە سوپاسی خەڵكی چەمچەماڵ دەكات، كە بە هاوارییەوە هاتوون و یارمەتی دەدەن بۆ رزگاركردنی ئەو كەلوپەلانەی لە كۆگاكەی ماونەتەوە و ژێرئاو كەوتوون، بۆ ئەمەش وتی، “زۆر سوپاسی هەموو ئەو كەسانە دەكەم بۆ یارمەتیدانم هاتوون و خوای گەورە پاداشتیان بداتەوە، چونكە من نازانم بە چ جۆرێك پاداشتیان بدەمەوە”.
دوێنێ لافاوێك ناحیەی شۆڕش و چەمچەماڵی گرتەوە و لە ئەنجامدا دوو هاوڵاتی گیانیان لەدەست دا و 12ی دیكەش بریندار بوون، زەرەر و زیانی زۆریش بە ماڵ و حاڵی هاوڵاتیانیش كەوت.
پێداچوونەوە: ئەرسەلان عەبدوڵا
