بۆ فرۆشتن عەرزی دەکات
پاسکیلە تاقانەکەی دارەتوو 180 مەدالیای پێوەیە
964+
ئەحمەد شەمزین – هەولێر
پاسکیلە خنجیلە و جوانەکە، کە بە تاقانەی دارەتوو ناسراوە، هی مندالیکی رۆح سووکە و 180 مەدالیای پێوەیە، زۆریشی خۆش دەوێت، کەچی نیازی فرۆشتنیشی هەیە.
شاڵاوی تەمەن 10 ساڵ خولیایەكی سەیری هەیە، ئەویش پێوەكردنی جوانكارییە بە پایسكیلەكەی و ڤیدیۆكردنی و دانانی لە سۆشیال میدیا.
شاڵاو شوان بۆ 964 وتی، “پێنج ساڵە ئەم پاسكیلەم هەیە، ناوی تاقانەی دارەتووە و زیاتر لە 180 مەدالیام پێوە كردووە، مامم یارمەتی داوم و هاوڕێكانم دەڵێن زۆر سەرنجڕاكێشە و هێشتا شتی دیکەش ماوە پێوەی بکەم”.
دەشڵێت، “ئەگەر ئۆتۆمبێلێك بكڕم مەدالیای زیاتری پێوە دەكەم، موشتەری هەیە تەلەفۆن دەكات بەڵام نایكڕ، بەس من بۆ حەزی خۆم وام لێكردووە و نرخی جوانكاری و مەدالیاكان زیاترە لەو نرخەی كە داوای دەكەم”.
ئەم پاسکیلە پڕ جوانکارییە ئەوەندە خۆشەویستە لە دڵی شاڵاودا، دڵی نایە لە دەرەوە داینێت و خستوویەتیە ژوورەکەی خۆی.
پێداچوونەوە: توانا نەقی
