رێنمایی پسپۆڕێک بۆ خانمان
“بەبێ دەستکێش و ماسک ملخوارەکە بەکارمەهێنن”
964+
دیلان محەمەدجەزا – سلێمانی
پسپۆڕێکی بواری دەرمانسازی هۆشداری بە خانمان دەدات کە بۆ پاککردنەوەی ناو ماڵەکانیان بە هیچ شێوەیەک ماددە پاککەرەوەکان تێکەڵ نەکەن و مەترسی بۆ سەر گیانی خۆیان دروست نەکەن.
د. رێناس رەئوف پسپۆڕی بواری دەرمانسازی و ژەهرزانی قسەی بۆ مایکی 964 کردووە و دەڵێت، “بەکارهێنانی پاککەرەوەکان کە ناوی جۆراوجۆریان هەیە لای خۆمان، وەک ملخوارەکە، بەبێ دەستکێش و ماسک مەترسیدارن و دەبنەهۆی وشکبوونەوەی پێست و چەندین نەخۆشی دیکە”.
ئاماژەی بەوەشکرد، نابێ بەهیچ شێوەیەک ئەو جۆرە ماددانە تێکەڵ بەیەکتر بکرێن و دەبێ بڕێکی زۆر ئاویان تێبکرێت، لە کاتی بەکارهێنانیشدا دەبێ دەرگا و پەنجەرەی ماڵ بکرێتەوە.
“کەیسی وامان هەبووە کە کەسەکە لەکاتی خاوێنکردنەوەی ماڵ بەو ماددانە، دەرگا و پەنجەرەی ماڵی قەپات کردووە و بەهۆیەشەوە لەهۆش خۆی چووە”، د. رێناس رەئوف وای وت.
پێداچوونەوە؛ شۆڕش قادری
