بە فڕۆكە هێرش دەكرێتەسەر بەلەمی كۆچبەران لە لیبیا

964+

ئەرسەلان عەبدوڵا

حکومەتی یەکێتی نیشتمانی لە لیبیا رایگەیاند، هێرشی ئاسمانی وردی ئەنجامداوە و چەند بەلەمێکی لە ناو بەندەری زووارە لە رۆژئاوای لیبیا کردووەتە ئامانج، کە گومانیان لێدەکرێت بۆ گواستنەوەی كۆچبەرانی قاچاغ لە دەریای ناوەڕاستدا بەكار بهێنرێن، ئەمەش لە كاتێكدایە ژمارەیەكی زۆری گەنجی كورد ئەو رێگایە بۆ گەیشتن بە ئەوروپا بەكاردەهێنن.

لە راگەیاندراوێكدا حکومەتی لیبیا روونیکردەوە، هێرشە ئاسمانییەکان دوای ئۆپەراسیۆنێکی وردی چاودێری و چاودێری تۆڕەکانی قاچاخچێتی دێت، کە بۆ ماوەیەک لەو ناوچەیە کاردەکەن، پشتڕاستیشیان کردەوە ئۆپەراسیۆنەکە بە وردبینییەکی بەرز و بەبێ هیچ زیانێکی گیانی ئەنجامدراوە.

حکومەتی ئەو وڵاتە جەختی لەوە کردەوە، کارەكە بەشێکە لە هەوڵەکانی دەوڵەت بۆ بەرەنگاربوونەوەی تۆڕەکانی بازرگانیکردن بە مرۆڤ و پاراستنی کەناراوەکانی لیبیا.

هەروەها بەردەوامیی هەماهەنگی نێوان دەزگا ئەمنی و سەربازییەکان دووپاتکردەوە بۆ دڵنیابوون لە کۆنتڕۆڵکردنی خاڵەکانی گەیشتن بە دەریا و رێگریکردن لە قۆستنەوەیان بۆ چالاکییە نایاساییەکان.

چەند ساڵێكە سنووریی ئاویی لیبیا بووەتە رێگەیەك بۆ كۆچبەران و لە چەندین وڵاتەوە هەوڵ دەدەن لە رێگەی ئاوەكانی لیبیاوە بگەنە ئەوروپا، بە تایبەتی ئیتالیا، لە هەرێمی كوردستان و عێراقیشەوە هاوڵاتیان ئەو رێگەیان بەكارهێناوە، بەڵام بە سەدانیان دەستگیركراون و ئینجا لە رێگەی حكومەتەكانی كوردستان و عێراقەوە بە هەزار تكا و رجا دەستگیركراوەكان بەردراون و گەڕێندراونەتەوە، ئەمە جگە لەوەی ئەو كۆچبەرە كورد و عێراقییانە ئازار و ئەشكەنجە دەدرێن و برسی و تێنوو دەبن و دەڕووتێندرێنەوە.

هەردوێنێ 25 گەنجی هەرێمی كوردستان، كە لە لیبیا دەستگیر كرابوون، گەڕێندرانەوە كوردستان و 12ی دیكەش هێشتا بێ سۆراغن و هەر خوا دەزانێت چیان بەسەر هاتووە.

25 گەنج لە لیبیا هاتنەوە و سۆراغی 12 کەسی دیکە دەکرێ