عێراق چەندین پارچە شوێنەوار لە سویسرا وەردەگرێتەوە

964+

فەهمی نەبی

عێراق کۆمەڵێک پارچەی شوێنەواری لە سویسرا وەرگرتەوە، کە مێژووی بەشێکیان تەمەنیان بۆ 3000 ساڵ لەمەوبەر دەگەڕێتەوە.

ئەو شوێنەوارانەی وەرگیردراونەتەوە، مێژووی کۆنی دوو سەردەمی جیاوازی عێراق بوون.

وەزارەتی دەرەوەی عێراق لە پەیجی خۆیان لە فەیسبووک بڵاوی کردەوە، بە هەوڵی عومەر بەرزنجی بریکاری وەزارەتی دەرەوەی عێراق ئەو پارچە شوێنەوارانە وەرگیردراونەتەوە.

ئەمڕۆ پێنجشەممە 2.3.2023، وەزارەتی دەرەوە لە پەیجی فەرمی خۆی لە فەیسبووک بڵاوی کردەوە کە دوو خەنجەری بڕۆنز و دوو سەرە رم کە مێژووەکەیان بۆ 1000 ساڵ بەر لە زایین دەگەڕێتەوە، لەگەڵیدا 25 دراوی سەردەمی عەباسییەکانیان وەرگرتۆتەوە.

عەباسییەکان، لەساڵی 749ی زایینی تاوەکو ساڵی 1258ی زاینی فەرمانڕەوایی عێراقیان کردووە.