ناو بازاڕی رانیە وێنە: سۆشیاڵ میدیا
دوو ملیاریان خەرجکردووە و پرۆژە دەکەن
شارەوانی رانیە دەیەوێت تا کۆتایی ئەمساڵ شارەکە بڕازێنێتەوە
964+
ژووری هەواڵ
پێشتر ئیدارەی راپەڕین و بەتایبەت ناوەندەکەی کە رانیەیە بە گۆڕستانی پرۆژە تەواو نەکراوەکان ناسرابوو، بەڵام ئێستا خەریکە دەرووی خێری لێدەکرێتەوە و چەندین پرۆژەی خزمەتگوزاریی لە رێگەیە.
سەرۆکی شارەوانی رانیە دەڵێت، چەندین پڕۆژەی جیاواز لە رانیە دەستی پێکردووە و پڕۆژەکان جیاواز و هەمەلایەنن، باس لەوەش دەکات ئێستا لە زۆربەی پڕۆژەکان کارکردن دەستیپێکرووە.
ئەحمەد مەلا وسو سەرۆکی شارەوانی رانیە بۆ 964 وتی، دەستیانکردووە بە جێبەجێکردنی 14 پڕۆژەی بچوک و مامناوەند لە زیاتر لە حەوت گەڕەکی جیاوازی ناو شاری رانیە، پلانەکەشیان تا کۆتایی ئەمساڵ کۆتایی پێدێت.
سەبارەت بە بڕە پارەی تەرخانکراو بۆ پرۆژەکان و جۆرەکانیان ئاماژەی بەوەکرد، زیاتر لە دوو ملیار دینار تەرخانکراوە و تێچووەکەی ئەوەندە دەبێت، پڕۆژەکان پێکدێن لە رێگاوبان، ئاوەڕۆ، باخچە و سەوزایی.
جگە لەم پڕۆژانەی کە پارەی بۆ تەرخانکراوە چەند پڕۆژەیەکی تریش لەلایەن ئیدارەی شارەکە و شارەوانیەکەمان سەرپەرشتی دەکرێت و جێبەجێ دەکرێت، ئەحمەد مەلا وەسو وای وت.
