"بەبەرد و بلۆک هێرش کراوەتە سەرمان"
دەرگای مزگەوتیان لێ داخرا و بەناچاری لەسەر شەقام نوێژیان کرد
964+
کاروان ساڵحی – کەرکوک
سەرپەرشتیاری مزگەوتی سەڵاحەدینی ئەیوبی لە گەڕەکی شۆراوی کەرکوک قفڵێکی گەورەی لە دەرگای مزگەوتەکەی داوە و دایخستووە، بۆیە نوێژخوێنان ناچاربوون نوێژی مەغریب و عیشای ئەمشەو لەسەر شەقام ئەنجام بدەن.
دەرباز میقداد پێشنوێژ و وتارخوێنی مزگەوتی سەڵاحەدینی ئەیوبی بە 964ـی وت، “نزیکەی چوار مانگە لەم مزگەوتە دام بێ هیچ کێشە و گرفتێک، هەفتەیەک بۆ 10 رۆژ دەبێ، سەرپەرشتیاری ئەم مزگەوتە بە پاڵپشتی کەسێکی تر داوای لە من کردووە ئێرە جێبهێڵم، بە مەرجێک بڕیاری وقفی سوننەم هەیە کە لێرە پێشنوێژ و وتارخوێن بم”.
“خەڵکی ئەم ناوچەیە پشتگیری منیان کرد و پێیان قبوڵ نەبوو بەبێ هیچ هۆکارێک لێرە دەربکرێم و بڕۆم”، مامۆستا دەرباز میقداد وای وت.
ئاماژەی بەوەشکرد، نیوەڕۆی ئەمڕۆ ئەو کەسە بە بەرد و بلۆک هێرشی کردووەتە سەریان و دەرگای مزگەوتەکەشی داخستووە.
سەبارەت بەو بابەتە 964 پەیوەندیکرد بە سالم زەنگەنە بەڕێوەبەری وەقفی سوننە لە کەرکوک، ئەو وتی، “دەبوو ئەو مامۆستا ئاینییە ئاگاداری ئێمەی بکردایەوە و ئێستاش ئەگەر کەموکورتی لە هەر کەسێک هەبێ، جا پێشنوێژ و وتارخوێنی مزگەوتەکە بێ یان سەرپەرشتیارەکە، ئەوا بە یاسا چارەسەری دەکەین”.
وتیشی، مامۆستا و نوێژخوێنانی مزگەوتی سەڵاحەدینی ئەیوبی دەتوانن سبەی سکاڵا تۆمار بکەن و ئەوانیش بەدواداچوونی بۆ دەکەن.
پێداچوونەوە؛ شۆڕش قادری
نۆ گەنجى ئەفغانى لە مزگەوتێکی کەرکوک دەستگیرکران
