یەکێکیان گیانى لەدەستدا دوانیان تەندروستیان ناجێگیرە
شێخان؛ حەوت ئەندامى خێزانێک لە تەنکەرى نەوتدا بورانەوە
964+
هێڤى دێوالى- دهۆک
لە قەزاى شێخان، مێردمنداڵێک بۆ پاککردنەوە چووەتە ناو تانکەرێکى نەوت، بەڵام تووشى تەنگەنەفەسى بووە و دواتر شەش لە ئەندامانى خێزانەکەى یەک بەدواى یەک بۆ رزگارکردنى دەچنە ناو تانکەرەکە، بەمشێوەیە سەرجەمیان تووشى بورانەوە و تەنگەنەفەسى دەبن و یەکێکیان گیان لەدەست دەدات.
شێخ سەردار یەحیا، قائیمقامى قەزاى شێخان بە 964ـى وت،”یەکێک لە ئەندامانى خێزانەکە چووەتە ناو تانکەرەکە کە سووتەمەنى و نەوتى سپى گواستووەتەوە و ویستوویەتى پاکى بکاتەوە، بەڵام بوراوەتەوە و دواتر شەش ئەندامى دیکەى هەمان خێزان بۆ رزگارکردنى چوونەتە ناو تانکى تانکەرەکە، بەڵام سەرجەمیان تووشى تەنگەنەفەسى و بورانەوە بوون”.
ئاشکراشى کرد، یەکێکیان گیانى لەدەستداوە و دوانیان تەندروستیان ناجێگیرە و چوار کەسیشیان مەترسیان لەسەر نییە و چارەسەرى پێویستیان وەرگرتووە.
پێداچوونەوە: وریا فەتاح
