وێستگەیەكی كارەبا لە عێراق
وەزارەتی كارەبا روونكردنەوەی دا
چلەی ئیمام حوسێن كارەبای لە عێراق كوژاندەوە
964+
ئەرسەلان عەبدوڵا
وەزارەتی كارەبای عێراق روونیكردەوە، بەهۆی فشاری زۆر لەسەر لە هەردوو پارێزگای كەربەلا و بابل و هاتنی ملیۆنان زیارەتكار بۆ چلەی ئیمام حوسێن، كوژانەوەی گشتی روویداوە.
ئەمڕۆ لە عێراق كوژانەوەی گشتیی كارەبا روویدا، لە كاتێكدا گەرماكەشی زۆر بەتینە و بەرگە ناگیرێت.
وەزارەتی كارەبای عێراق راگەیاندراوێكی بڵاوكردەوە و دەڵێت، بەهۆی زۆری رێژەی زیارەتکاران بۆ چلەی ئیمام حسێن لە هەردوو پارێزگای کەربەلا و بابل فشارێکی زۆر لەسەر کارەبای نیشتمانی دروست بوو، كە بووە هۆی پچڕانی هێڵی كارەبای موسەیەب – بابل 400 كەی ڤی و بەمەش سیستمی گشتیی كارەبا كوژایەوە و شەش هەزار مێگاوات كارەبا لە دەست بدەین.
وەزارەتی كارەبا دەڵێت، شەو و رۆژ كاردەكەین بۆ ئەوەی توانای بەرهەمهێنان و گواستنەوە و دابەشكردنی كارەبا زیاد بكەین.
هەروەها دەڵێت، پلەكانی گەرما تا ئاستێكی پێشبینینەكراو بەرزبووەتەوە و خواست لەسەر كارەبا زیاتر بووە، ئەمەش فشاری لەسەر وێستگەكان دروست كردووە، بە تایبەتی لە پارێزگاكانی بابل و كەربەلا، كە بە ملیۆنان زیارەتكاری چلەی ئیمام حوسێن هاتوون.
وەزارەتەكە ئاماژە بەوەش دەكات، ئێستا تیمەكانیان بەخێرایی هاتوونەتە مەیدان بۆ ئەوەی كێشەكان چارەسەر بكەن و هێڵە پچڕاوەكانی گواستنەوە چاك بكەن و هەنگاو بە هەنگاو كارەبا بگەڕێننەوە دۆخی ئاسایی خۆی.
