پۆلیسی دارستان و ژینگە بە زستان و هاوین لە خەمی باڵندە و ئاژەڵە کێوییەکاندایە

964+

شۆڕش قادری

پۆلیسی دارستان و ژینگە تەنیا بەدەستگیرکردنی راوچیان، لە خەمی ئاژەڵ و باڵندە کێوییەکاندا نییە، ئەوەتا لە چەند شوێنێکی کوردستان دەستیان کردووە بە دروستکردنی گۆلی ئاو، بۆ ئەوەی لەم گەرما تاقەتپڕوکێنەدا لە تینوێتیدا نەخنکن.

هێمن کەمەرخان وتەبێژی پۆلیسی دارستان و ژینگەی سلێمانی بە 964ـی وت، کارمەندانی بنکەی پۆلیسی دارستان و ژینگەی ئاغجەلەر بە هاوکاری بەڕێوەبەری ناحیەی ئاغجەلەر چەند رۆژێکە بەوپەڕی هەستکردن بە بەرپرسیارێتی و دڵسۆزی هەستاون بە دروستکردنی چەند گۆلێک و دابینکردنی ئاو لەچەند ناوچەیەکی سنورەکەیان بۆ ئاژەڵ و باڵندە کێویەکان، بۆ ئەوەی لەم وەرزی گەرما و کەم ئاوییەدا، بەئاسانی دەستیان بەئاو بگات.

“هەموو ئەو گۆلە ئاوانە بە وردی چاودێری دەکرێن تا لە راوچییەکان بپارێزرێن”، هێمن کەمەرخان وای وت.

ئاماژەی بەوەشکرد، جگە لە ئاغجەلەر، لە دەربەندیخان، پێنجوێن و شارباژێر و چەند شوێنێکی دیکەی سنووری سلێمانی ئەو کارە دەکەن، تەنانەت لە هەندێک شوێن دانیشیان بۆ رۆدەکەن، هەروەک لە زستانیشدا ئەو کارە دەکەن.

لە سێ رۆژدا پێنج کەس لەسەر راوى ئاژەڵ و باڵندەى کێوى دەستگیر کراون

لە پێنجوێن پۆلیسی دارستان و رێکخراوێکی ژینگەیی خۆراکیان بۆ باڵندەکان دابینکرد