“لەگەڵ گومرگ و بازگەكانی كوردستان تەنسیقی باشمان هەیە”

964+

ئەرسەلان عەبدوڵا

دەستەی دەروازە سنوورییەكانی عێراق رایگەیاند، رێوشوێنی توند و چاودێرییەكی باشیان داناوە بۆ رێگریكردن لە هاتنی كەلوپەلی قەدەغەكراو، ئاشكراشی دەكەن لەگەڵ گومرگی كوردستان هەماهەنگیی باشیان هەیە بۆ یەكخستنی نرخ و چاودێریی توند.

سەرۆكی دەستەكە ناوی لیوا عومەر وائیلییە و بە ئاژانسی فەرمیی عێراقی راگەیاندووە، “دەسەڵاتی دەروازە سنوورییەکان لە چەند بوارێکدا لە ناو دەروازەكاندا کار دەکەن، بە تایبەتی سەبارەت بە زیادكردنی داهات لە رێگەی چالاککردنی چاودێری و وردبینی، چاودێریکردنی تێپەڕبوونی کاڵاکان، دڵنیابوون لەوەی کە مەرجەکانی هاوردەکردنی پێویستیان تێدایە و گونجاون بۆ بەکارهێنانی مرۆڤ و چەند لایەنێكی دیكە، لەوانە ئاسانکاری بۆ جوڵەی گەشتیاران پێشکەشکردنی خزمەتگوزاری بۆیان”.

“دەستەكە کۆنتڕۆڵەکانی لەگەڵ پارێزگاکانی هەرێمی کوردستان کاراکردووە بۆ چاودێریکردنی رێکارەکانی گومرگی، بە ئامانجی گرتنەبەری رێکارە یەکگرتووەکان و یەک نرخی گومرگی، ئەمە جگە لە چاودێریکردنی توندی کاڵا قەدەغەکراوەکان”، لیوا عومەر وائیلی وادەڵێت.

ئاماژەی بەوەش کردووە، “دەستەی دەروازە سنوورییەكان کاری کردووە بۆ چاودێریکردنی پرۆسەی ژمێریاری باجی ئەو کۆمپانیایانە کە لە رێگەی بەندەرەکانەوە کاڵا هاوردە دەکەن و دڵنیابوون لە ئەستۆپاكییان، بەڵام زۆرێک لەو کۆمپانیایانە دەستنیشانکراون کە پابەند نەبوون بە ژمێریاری باج و سەرقاڵی کاری گومرگین، ئەمەش پێشێلکارییەکی ئاشکرایە بۆ بڕیارەکانی ئەنجومەنی وەزیران و رێنماییەكانی حکومەت”.

ئاشكراشی كرد، نزیکەی 189 کۆمپانیا دەستنیشانکراون کە پابەند نەبوون بە پێدانی باج بۆ ساڵانی پێشوو لە رێگەی لیژنەیەکی هاوبەشەوە لە بەندەرەکان و باجەکانەوە، كە لە ژێر چاودێری دادگادا دەبێت.

لە خانەقینەوە بۆ سۆران؛ لە پێنج دەروازە پەیامنێران باسی دۆخی سنوور دەکەن