لە جامی ئۆتۆمبێلەکەی کەوتە دەرەوە و گیانی لەدەست دا

+964
سیروان خورشید – دوزخورماتوو

سەربازێکی سوپای عێراق کە دانیشتووی قەزای خورماتووە لە کاتی رۆیشتنی بۆ دەوام، درەنگانێکی شەوی رابردوو لە ناوچەی زەرگەی خۆرئاوای خورماتوو تووشی روداوێکی هاتوچۆ بووە و گیانی لەدەستداوە.

عەمید موئەیەد عەباس، بەڕێوەبەری هاتوچۆ دەرەکییەکانی سەڵاحەدین بە 964ـی وت، “رووداوەکە درەنگانی شەوی رابردوو روویداوە، شۆفێری ئۆتۆمبێلێکی جۆری ئۆپڵ فیکترا، لە خورماتووەوە بەرەو سەڵاحەددین رۆیشتووە و لە ناوچەی زەرگەی خۆرئاوای خورماتوو، بەهۆی تیژڕەوی و تاریکیی رێگاکەوە خۆی بە ستوونێکی کارەبادا کێشاوە و کۆنتڕۆڵی لە دەستداوە و وەرگەڕاوە، لە کاتی وەرگەڕاندا شۆفێرەکە لە جامی ئۆتۆمبێلەکەوە کەوتووەتە دەرەوە و گیانی لەدەستداوە.

وتیشی، شۆفێرەکە پیشەی سەرباز بووه لە نێو سوپای عێراق، ئەمشەو لە خورماتووە ویستویەتی بچێتەوە بۆ دەوامەکەی و گیانی لەدەستداوە.

پشتیوان عەبدوڵا، ئامۆزای ئەو سەربازەی تووشی رووداوەکە بووە، بە 964ـی وت، “ئامۆزاکەی ئەمشەو خۆی ئامادە کرد بچێتەوە بۆ دەوام، بەڵام مەرگ رێگەی لێ گرت و بە رووداوی هاتوچۆ گیانی لەدەست دا.
وتیشی، هەر دوای رووداوەکە لەلایەن هاتوچۆکارانی سەر رێگاکە، تەرمەکەی رەوانەی نەخۆشخانەی ئازادی کەرکوک کراوە، بڕیارە دوای لێکوڵینەوە و توێکاری پزیشکی، ئەمڕۆ تەرمەکەی رادەستی خێزانەکەی بکرێتەوە.

ئاماژەی بەوەش کرد، ئامۆزاکەی ناوی “محەمەد كەریم”ە، تەمەنی 47 ساڵە و خێزاندارە و خاوەنی منداڵێکە، دانیشتووی گەڕەکی برایەتی خورماتووە و لە سوپای عێراق سەرباز بووە و دەوامەکەی لە پارێزگای سەڵاحەدین بووە”.

پێداچوونەوە: ئەرسەلان عەبدوڵا