شەڕی ئێران و ئیسرائیل ئەنجومەنی ئاسایشی نێودەوڵەتی کردووە بە دوو بەرەوە

964+

عەبدولعەزیز خالند – هەولێر

شەڕی نێوان ئێران و ئیسرائیل ئەنجومەنی ئاسایشی نێودەوڵەتی کردووە بە دوو بەرەوە و ئەمریکا و بەریتانیا و هاوپەیمانەکانیان پێداگرن لەوەی کە دەبێت ئێران کۆتایی بە چالاکییە ئەتۆمییەکانی بهێنێت و روسیا و هاوپەیمانەکانیشی، ئیسرائیل بە تاوانبار دەزانن و داوای لێدەکەن هێرشەکانی رابگرێت.

پاشنیوەڕۆی ئەمڕۆ هەینی 20.6.2025 کۆبوونەوەی ئەنجومەنی ئاسایشی نێودەوڵەتی بۆ تاوتوێکردنی شەڕی نێوان ئیسرائیل و ئێران دەستیپێکرد و هەردوو نوێنەری ئەمریکا و بەریتانیا لە رێکخراوی نەتەوە یەکگرتووەکان لە کۆبوونەوەکەدا داوایان لە ئێران کرد دەستبەرداری چەکی ئەتۆم بێت و رایانگەیاند، گومان لەوەدا نییە کە لەپاڵ ئیسرائیلدا دەوەستنەوە و دەبێت ئێران واز لە بەرنامە ئەتۆمییەکی بهێنێت بۆ ئەوەی کاوڵکاری نەبینین.

لەبەرامبەردا نوێنەرانی روسیا و جەزائیر لە نەتەوە یەکگرتووەکان هێرشەکانی ئیسرائیلیان بۆ سەر ئێران بە ناڕەوا و پێشێلکردنی ئاشکرای یاسا نێودەوڵەتییەکان وەسفکرد و داوایان لەو وڵاتە کرد، هەرچی زووە کۆتایی بە هێرشەکانی بهێنێت.

هەر لە کۆبوونەوەکەدا نوێنەرانی ئێران و ئیسرائیل رووبەری یەکتربوونەوە، نوێنەرەکەی ئێران وتی، “کەس باوەڕ بە درۆی نوێنەرەکەی ئیسرائیل و هاوپەیمانەکانی ناکات”، دواتر نوێنەری ئیسرائیل وەڵامی دایەوە و وتی، “ئێوە گورگن لە پێستی مەڕدا، دەتانەوێ خۆتان وەک قوربانی پیشان بدەن”.

لە بەربەیانی رۆژی هەینی رابردووەوە، بە موشەکبارانکردنی تاران لەلایەن ئیسرائیلەوە جەنگی نێوان ئێران و ئیسرائیل دەستیپێکردووە و ئەوەش نیگەرانی وڵاتانی جیهانی لێکەوتووەتەوە، هەربۆیە ئەمڕۆ ئەنجومەنی ئاسایشی نێودەوڵەتی لەسەر ئەو پرسە کۆبووەوە و تا ئێستاش کۆبوونەوەکە بەردەوامە.

ئیسرائیل هێرشی کرد بەس موشەکێک نیگەرانی بۆ دروستکردووە

رۆژانە ئیسرائیل سەدان ملیۆن دۆلار بۆ هێرشی سەر ئێران خەرجدەکات