قایمقامی سلێمانی: رووبەڕووی وشکەساڵی بووینەتەوە

964+

محەمەد فاتیح

كاریگەرییەكانی وشكەساڵی بە ئاشكرا بە هەرێمی كوردستانەوە دیارە و قایمقامی سلێمانیش كۆبوونەوەیەكی سەبارەت بە وشكەساڵی و چۆنێتی دابینكردنی ئاو بۆ هاوڵاتیان ئەنجام دا.

قایمقامیەتی سلێمانی بڵاویكردەوە بەمەبەستی خۆگونجاندن و رووبەڕووبونەوەی وشکەساڵی لە وەرزی هاویندا، قایمقامی سلێمانی لەگەڵ بەڕێوەبەر و لێپرسراوی فەرمانگە پەیوەندیدارەکان کۆبووەوە و رێکاری پێویست دیاریکرا بۆئەوەی هاوڵاتیان ئاوی پێویستی خواردنەوەیان بەدەست بگات و ئاو بۆ باخچە و سەوزاییەکانیش دابین بکرێت”.

لە کۆبونەوەکەدا ئاوات محەمەد قایمقامی سلێمانی وتى، “رووبەڕوی دۆخێکی نەخوازراو بووینەتەوە کە وشکەساڵییە و هەموو هەوڵی خۆمان بەکاردێنین بۆئەوەی لە وەرزی هاویندا ئاوی پاک بۆ خواردنەوە و ئاودانی باخ و سەوزاییەکانیش دابین بکەین و هەروەها رێگەش بگرین لە بڵاوبوونەوەی پەتای سکچون و رشانەوە و ڤایرۆسی کۆلێرا”.

لە کۆبونەوەکەدا پێشنیارکرا به:

-دروستکردنی لیژنەیەکی باڵا بۆ رووبەرووبونەوەی وشکەساڵی.

-دانانی بودجەیەکى تایبەت بە وشکەساڵی لەلایەن ئەنجومەنی وەزیرانەوە.

-چاككردنەوەی هەموو ئەو بیرانەى لە دەوروپشتی سلێمانی هەن و ئاوەکانیان بەکەڵکی خواردنەوە دێن و هەتا کۆتایی وەرزی هاوین ئیدارە بدرێن بۆ ئەوەی هاوڵاتیان پەنا نەبەنە بەر ئاوی نەشیاو.

-لە رێگەی شەمعەکانەوە ئاو بۆ سەوزایی و باخچە و پارکەکان دابین بکرێت.

-چاودێری هەموو ئەو تانکەرانە بکرێت کە ئاو دەفرۆشن بە هاوڵاتیان.