گەنم شارەزووری سەوزپۆش کردووە

964+

ئەحمەد مستەفا – سلێمانی

بارانبارینی زۆری ئەمساڵ دڵی جوتیارانی دەشتی شارەزووری خۆشکردووە، چونکە بە سەوزیی زەوییەکان بێت ئەمساڵ بەرهەمیان لە ساڵانی پێشتر زیاتر دەبێت.

رووبەری زەوی بەراوی کشتوکاڵی لە شارەزوور 18 ھەزار و 127 دۆنمە، ئەو زەوییانەی پشت بە باران دەبەستن بۆد داچاندن 54 ھەزار و 66 دۆنمن. 

فەرەیدون حوسێن، بەڕێوەبەری کشتوکاڵی شارەزوور بە تۆڕی 964ی وت, زەوییەکانی دەشتی شارەزوور بە رێژەی سەدا 100 سوودیان لە بارانبارینی ئەمساڵ وەرگرتووە.

تا ئێستا 258 میلیمەتر باران لە شارەزوور باریوە. بەراورد بە ساڵی رابردوو تا ئەم کاتانە 223 میلیمەتر باران باریبوو.

بەشی بەرچاوی زەوییەکان بە گەنم چێندراون.

ساڵی رابردوو، 50 ھەزار تۆن گەنم ھەبووە، کە تەنیا لە سایلۆی سەیدسادق 18 ھەزار تۆن گەنمی دەشتی شارەزوور رادەستکراوە.

“تەنیا هاوکاریی ئێمە بۆ جوتیاران ئەوەیە، بنەتۆویان بە نرخی سەدا 30 کەمتر پێ دەفرۆشین”، فەرەیدون حوسێن وای وت.

پێداچوونەوە: پێشەوا محەمەد