لە وەرزی قەدەغەی راوەماسیدا 55 راوچی دەستگیر کراون
چوار راوچی بە 400 کیلۆ ماسی و کیسەڵێکی (جەلاوی) لە سنووری دهۆک دەستگیرکران
964+
هیڤی دێوالی – دهۆک
چوار راوچی بە 400 کیلۆ ماسییەوە لە سنووری دهۆک و لەسەر بەنداوی موسڵ دەستگیر کران و لە وەرزی قەدەغەی راوەماسیدا، 55 راوچی لەو دەڤەرە دەستگیر کراون.
دوو مانگ و شەش رۆژە بەڕێوەبەرایەتی هێزی دهۆک بۆ پاراستنی ژینگە، مەفرەزەی گەرۆکی لە سەرجەم بەنداو و رووبارەکانی پارێزگاکە و ئیدارەی سەربەخۆی زاخۆ داناوە.
ئەمڕۆ دووشەممە 26.5.2025 رەمەزان سیاری بەرپرسی مەفرەزەی هێزی دهۆکی ژینگەپارێزی پێشمەرگە لە پاڕیزگای دهۆک بە 964ـی وت، ” لە گوندی سورێ لە نێوان قەزای باتیفا و سێمێل و لەسەر بەنداوی موسڵ، چوار کەس لەکاتی راوەماسیدا لەلایەن تیمەکانمانەوە دەستگیر کراون”.
“ئەو کەسانە کوردن و 400 کیلۆ ماسیان پێوە گیراوە لەگەڵ جورە ئاژەڵێک کە وەکو کیسەڵەیە و هەر کیلۆیەکی بە 50 هەزار دینارە”، رەمەزان سیاری وای وت.
کیسەڵی “جەلاوی”، ناوە زانستییەکەی “رافتیز یوفراتیک”ـە، واتە کیسەڵی رووباری فورات، خاوەنی قۆزاخەیەکی نەرمە و بەهۆی ئەوەی گۆشتەکەی دەخورێت، مەترسی لەنێوچوونی لەسەرە.
ئاماژەی بەوەشکرد، لەسەرەتای وەرزی قەدەغەی راوە ماسی تا ئەمڕۆ، 55 کەسیان دەستگیر کردووە و دەستیشیان بەسەر زیاتر لە 900 کیلۆ ماسیدا گرتووە، سەرجەم ئەو کەسانەش دراونەتە دادگا و لێپێچینەوەیان لەگەڵدا دەکرێت.
بە بڕیاری وەزارەتی کشتوکاڵ لە 20.3.2025ـەوە قەدەغە خراوەتە سەر راوەماسی تاوەکو 20.6.2025 و هەر کەس لە چەم و رووبار و دەریاچەکان راو بکات سزا دەدرێت.
پێداچوونەوە؛ شۆڕش قادری
نرخی ماسی لە دهۆک هاڕەی کردووە
پۆلیسی دهۆک بەردەوامە لە دەستگیر کردنی راوچیانی ماسی
ژینگهى ههولێر تهواوى بهڵگهكانى لهسهر راوكردنى گیاندارێكی خشۆك تهسلیم به دادگاى لێكۆڵینهوهى خهبات كرد
