دیمەنێکی گوندی سەکران لە ئیدارەی سەربەخۆی سۆران - وێنە: فەرمانگەی میدیا و زانیاری هەرێم
"دەبێت پشتگیری و رێگەپێدانیان پێبێت"
بۆ سەردانیکردنی کوێستانەکانی سۆران مەرج بۆ جوتیاران و هەنگەوانان دانرا
964+
شۆڕش قادری
بۆ سەردانیکردنی کوێستانەکانی سۆران، مەرج بۆ جوتیاران و هەنگەوانان و مەڕداران دانرا و دەبێت رێگەپێدان و پشتگیرییان پێبێت، ئەگەرنا سزا دەدرێن.
ئێدارەی سەربەخۆی سۆران لە ئاگادارییەکدا بڵاویکردەوە، سەبارەت بە جوتیار و ھەنگەوان و مەڕدارەكان كە دەیانەوێت، بچن بۆ كوێستانەکانی قەزای چۆمان و سیدەكان، لە رۆژی سێشەممەوە 20.5.2025 رێگەیان پێدەدرێت بۆ سەردانیکردن، بەپێی ئەم مەرجانەی خوارەوە:
یەکەم:
ئەو هاووڵاتیانەی ساڵی رابردوو ناسنامەی رێگەپێدانیان بۆ کراوە، پێویستە پشتگیری یەكەی كارگێڕی (قائیمقامیەت و بەڕێوەبەرایەتی ناحیە)ی شوێنی نیشتەجێبوون و فەرمانگەی ڤێتێرنەریان پێ بێت، ئینجا رێگایان پێدەدرێت سەردانی کوێستانەکان بکەن.
دووەم:
سەبارەت بەو كەسانەی بۆ جاری یەكەم سەردانی كوێستانەكان دەكەن، پێویستە پشتگیری یەكەی كارگێڕی (قائیمقامیەت و بەڕێوەبەرایەتی ناحیە)ی شوێنی نیشتەجێبوون و فەرمانگەی ڤێتێرنەری) هەبێت، ھەروەھا سەردانی قائیمقامیەتی قەزای چۆمان یان سیدەكان بكەن و ڕەزامەندیان وەربگرن و ناسنامەیان بۆ درووست بكەن، ئەوكات ڕێگەیان پێ دەدرێت مەڕ و ماڵاتیان بگوازنەوە.
سێیەم:
پێویستە مەڕ و ماڵات بە ئۆتۆمبێلی بارھەڵگر بگوازرێتەوە، بە پیادە رێگەپێدراو نییە و بە پێچەوانەوە رێكاری یاساییان بەرامبەر دەگیرێتەبەر بە (پێبژاردن و رێپێنەدان).
بۆ روونکردنەوەی زیاتری بابەتەکە 964 پەیوەندی کرد بە کامەران حسێن مامەند بەڕێوەبەری گشتی کشتوکاڵی سۆران، ئەو وتی، هەفتەی رابردوو لە ئیدارەی سەربەخۆی سۆران کۆبوونەوەیەک بە ئامادەبوونی بەڕێوەبەری ناحیە و قایمقامەکانی سنوورەکە کراوە و لەبەر بارودۆخی ئەمنیی، کێشەکانی سەر سنوور، تەقینەوەی مین و تەقەمەنی و پاراستنی گیانی جوتیاران و مەڕداران لەم وەرزەدا، ئەو بڕیارە دەرکراوە.
باسی لەوەشکرد، هەموو ساڵێک لەم کاتەدا ئەو بڕیارە دەدەن، بەڵام ئەمساڵ بەهۆی بێ بارانی و وشکەساڵی کەمێک کاتەکەی پێشکەوتووە و بابەتی بڵاوبوونەوەی نەخۆشی تای خوێنبەربوونیش لەبەرچاو گیراوە.
سێ رۆژە شاخەکانی سۆران لە زبڵ و پاشماوە پاکدەکرێنەوە
