وێنەی ئەرشیفی هەڵمەتی دەستبەسەراگرتنی ماتۆڕسکیل لەلایەن هێزە ئەمنییەکانەوە
"کامێراکان بوونەتەهۆی کەمبوونەوەی رێژەی مردن بە رووداوەکانی هاتوچۆ"
هەر ماتۆڕێک لە هەر ناوچەیەکی کوردستان ژاوەژاو بکات دەستی بەسەردادەگیرێت
964+
شۆڕش قادری
هاتوچۆی هەرێم سەرجەم بەڕێوەبەرایەتییەکانی لە پارێزگا و ئیدارە سەربەخۆکان راسپارد، دەستبەسەر ئەو ماتۆڕسکیلانەدا بگرن کە ژاوەژاو دەکەن و خەڵکی هەراسان دەکات، دەشڵێت، بە دانانی کامێراکانی تۆمارکردنی تیژڕەویی، رێژەی مردن و برینداربوون بە رووداوەکانی هاتوچۆ لە هەموو کوردستان کەم بووەتەوە.
بەپێی راگەیەنراوێکی بەڕێوەبەرایەتی گشتی هاتوچۆی هەرێم، لە دیوانی وەزارەتی ناوخۆ، کۆبوونەوەیەک بە بەشداری بەڕێوەبەری هاتوچۆکانی پارێزگا و ئیدارە سەربەخۆکان و بەڕێوەبەرانی بەشی مۆڵەت و سەرپەرشتیارانی هۆبەکانی مۆڵەتی شوفێری، ئەنجام دراوە و تیایدا چەند بابەتێکی تایبەت بە جێبەجێکردنی یاسا و رێنماییەکانی هاتوچۆ و لێپێچینەوە لەو کەسانەی سەرکێشی دەکەن، تاوتوێ کراون.
باس لەوەشکراوە کە رێکەوتن کراوە لەگەڵ کۆمپانیاکانی گەیاندنی خواردن کە دەست بکەن بە تۆمارکردنی ماتۆرسکیلەکانیان لە بەرێوەبەرایەتییەکانی هاتوچۆ و هێنانی ماتۆری بێدەنگ و کارەبایی بۆ کەمکردنەوەی ژاوەژاو کە بوونەتە هۆی بێزارکردنی هاوڵاتیان، بەڕێوەبەرانی هاتوچۆی پارێزگا و ئیدارەکانیش راسپێردراون کە دەست بگرن بەسەر هەر ماتۆرسکیلێک کە دەستکاری دەنگی کردووە و خەڵک هەراسان دەکات، رێگریش لەو ماتۆرسوارانە بکەن کە لەسەر شەقامەکان نمایش دەکەن و سەرکێشی دەکەن، هەر ماتۆرسکیلێک تۆمارکراو نەبێت و تابلۆی نەبێت، دەستی بەسەردا دەگیرێت.
هەر لە کۆبوونەوەکەدا ئاماژە بەوە کراوە کە دانانی کامێراکانی تۆمارکردنی تیژڕۆیی دەستکەوتیان هەبووە و بوونەتەوە هۆی کەمبوونەوەی رووداوەکانی هاتوچۆ و مردن و بریندار بوون لە هەموو ناوچەکانی کوردستان.
لە عێراق بۆ ماوەى 90 رۆژ ماتۆڕسکیلەکان دەستیان بەسەردا ناگیرێت
