ئەمە وەڵامی عێراقە بۆ ترەمپ؛ بازرگانی راستەوخۆتان لەگەڵ دەکەین

964+
ئەحمەد مستەفا

عێراق بە کۆبوونەوەیەک وەڵام و هەڵوێستی خۆی بۆ سەپاندنی باجی گومرگی بەرێژەی 39% لەلایەن سەرۆکی ئەمریکاوە دایەوە و دەیەوێت، لەمەبەدوا خۆی راستەوخۆ مامەڵە لەگەڵ ئەمریکا بکات بۆ ئاڵوگۆڕی بازرگانی، چونکە دەرکەوتووە، وڵاتی دراوسێ سەرچاوەی هاتنی کاڵای ئەمریکییە بۆ وڵاتەکەی.

محەمەد شیاع سودانی، سەرۆک وەزیرانی عێراق، ئەمڕۆ شەممە 5.4.2025، سەرپەرشتی کۆبوونەوەیەکی بۆ تاوتوێکردنی کاریگەرییە ئابووری و بازرگانییەکانی بڕیارەکەی حکومەتی ئەمریکا بۆ زیادکردنی باجی گومرگی لەسەر هاوردەکردنی کاڵا لە سەرانسەری جیهان کرد.

لە دیدارەکەدا کاریگەری ئەم هەنگاوە لەسەر ئابوری جیهان بە گشتی و نرخی نەوتی خاو و تا چەند کاریگەری لەسەر ئابووری عێراق دەبێت، خراوەتەڕوو و تاوتوێ کراوە.

وەک لە راگەیەندراوەکەدا هاتووە، لە کۆبوونەوەکەدا پێداچوونەوە بە داتا دیجیتاڵییەکان کراوە، کە لە وەزارەتی بازرگانییەوە دەرچووە، کە دەرکەوتووە بەرزبوونەوەی رێژەی سەدی گومرگی ئەمریکا لەسەر کاڵای عێراقی، لەسەر بنەمای جیاوازی هاوسەنگی بازرگانی نێوان هەردوو وڵات بووە، نەک لەسەر بنەمای باجی گومرگی کە عێراق بەسەر کاڵای ئەمریکیدا سەپاندوویەتی لە رابردوودا.

داتاکانی وەزارەتی بازرگانی ئاشکرای دەکەن، زۆرینەی هاوردەکردنی کاڵای ئەمریکی لە عێراق لە بازاڕەکانی وڵاتانی دیکەوە سەرچاوە دەگرێت، ئەمەش لە ئەنجامی هەندێک سیاسەتی کۆمپانیا ئەمریکییەکان لە مامەڵە بازرگانییەکانیان لەگەڵ عێراقدا پەیڕەوی دەکەن.

راگەیەندراوی کۆبوونەوەکە دەڵێ، لەبەر رۆشنایی ئەو راستیانە و لەپێناو دەستەبەرکردنی باشترین رێگا بۆ پەرەپێدانی ئابوری عێراق، محەمەد شیاع سودانی، سەرۆک وەزیرانی عێراق رێنمایی کرد کە رێوشوێنی پێویست بگیرێتەبەر، بەگوێرەی ئەوەی بەرژەوەندییە باڵاکانی ئابوری عێراق زامن دەکات؛

بەم شێوەیە: 1- کارکردن بۆ پەرەپێدانی پەیوەندییە بازرگانییە هاوبەشەکان، لەڕێگەی کردنەوەی دەرچە بۆ دابەشکاران و دەزگا بازرگانییە ئەمریکیەکان، چالاککردنی دەزگا بازرگانییە عێراقییەکان، و مامەڵەی بازرگانی راستەوخۆ لە نێوان کەرتەکانی هاوتا لەگەڵ ویلایەتە یەکگرتووەکانی ئەمریکا.

2- کارکردن بۆ پەرەپێدانی خزمەتگوزاری بانکی لە نێوان کەرتی بانکی و دارایی لە عێراق و ئەمریکا، بە شێوەیەک مسۆگەری بەدیهێنانی بەرژەوەندی ئابوری هاوبەش بکات.

3- ئاڕاستەکردنی تیمی دانوستانکار لەگەڵ لایەنی ئەمریکی بۆ پێداچوونەوە بە بناغەکانی پەیوەندی بازرگانی لەگەڵ ئەمریکا، بە ئامانجی باشترکردنی، و دڵنیابوون لە بنیاتنانی پەیوەندیی هاوسەنگی ئابووری و بازرگانی کە گەرەنتی بەرژەوەندی هاوبەشی نێوان هەردوولا بکات و پەرەپێدانی هاوبەشییەکی ئەرێنی.

4- وەزارەتەکانی دەرەوە، دارایی و بازرگانی، و لایەنە پەیوەندیدارە پەیوەندیدارەکان، گفتوگۆیەکیان لەگەڵ لایەنی ئەمریکی کردەوە، بۆ دڵنیابوون لە بەهێزکردنی پەیوەندییە بازرگانییەکان، چاودێریکردنی بازاڕە داراییەکان و شارەزایی ئابووری، و پێشکەشکردنی راپۆرتی هەفتانە بۆ نوسینگەی سەرۆک وەزیران.