ئومێد خۆشناو بۆ خوانی نیوەڕۆی جەژن میوانی ماڵی دنیادیدەکان بوو – وێنە: پارێزگای هەولێر
جەژنەکەیان لێتێکچووە و لێیانبووە بە جەژنی قوربان
پارێزگاری هەولێر خوانی نیوەڕۆی جەژنی لە ماڵی دنیادیدەکان نۆش کرد
964+
شۆڕش قادری
ئومێد خۆشناو پارێزگاری هەولێر خوانی نیوەڕۆی یەکەم رۆژی جەژنی لە ماڵی دنیادیدەکان نۆش کرد و دیاریشی پێدان.
پەڕەی تایبەتی پارێزگای هەولێر لە فەیسبووک چەند وێنەیەکەی بەسەرکردنەوەی ماڵی بەساڵاچووانی لەلایەن ئومێد خۆشناو بڵاوکردووەتەوە، بەڵام هەڵەیەکی بچووکیان کردووە و نووسیویانە، وەک نەریتی ساڵانەی خۆی، ئەمرۆ یەکشەممە 30.3.2025 ئومێد خۆشناو پارێزگاری هەولێر لەیەکەم رۆژی جەژنی قوربانی پیرۆزدا (لەبری جەژنی رەمەزان) سەردانی بەساڵاچووانی هەولێری کرد و لە لایەن بەڕێوەبەری ماڵەکە و چاودێران و تەواوی ئەو بەساڵاچووانەوە پێشوازی لێکرا.
ئاماژە بەوەشکراوە، پارێزگاری هەولێر لە نزیکەوە لە دۆخی بەساڵاچووانی پرسیوە و ئامادەیی هەموو هاوکارییەکی مادی و مانەوی نیشانداوە، داواشی کردووە کۆمەڵگە رێز لە دنیادیدە وبەساڵاچووان بگرێت و بەردەوام هاوکاری و یارمەتیدەریان بێت.
ئومێد خۆشناو دیاری و هاوکاریشی بەسەر بەساڵاچوواندا دابەش کرد.
محافز بەتەنیا نەبوو و یوسف چاوشین قازی بەڕێوبەری گشتیی چاودێری و گەشەپێدانی کۆمەڵایەتی هەولێر و شێخ زەیتۆ بەڕێوەبەری خانەی بێسەرپەرشتانی هەولێر و عەمید خەسرەو بەڕێوەبەری کاروباری ناوخۆی دیوانی پارێزگا و ناز جەلال بەرێوەبەری Ejcc، یاوەرییان کرد کە بۆ نانی بەیانی جەژنیش، لە خانەی نەوجەوانان و منداڵانی کوڕان و کچانی هەولێر بوون.
