هەڵمەتی پاککردنەوەی سەیرانگەی گۆڵێ - وێنە: بۆ 964 نێردراوە
بۆ کاتی پاککردنەوە رێکەوتن کراوە
خۆڵ و خاشاکەکەی گۆڵی پاککرایەوە و حاویەشی بۆ دێت
964+
کامیار کەمال – پێنجوێن
سەیرانگای گۆڵێ لە خۆڵ و خاشاک و پاشماوە پلاستیکیەکان پاککرایەوە، لەمەودا شارەوانی لەگەڵ کۆمپانیای پاککەرەوە رێکەوتوون کە لە هەفتەیەکدا دوو رۆژ “شەممە و پێنجشەممە” سەیرانگاکە پاکبکەنەوە.
شەممە پاشماوەی سەیرانکاران پاکدەکەنەوە و پێنجشەممانیش پێش هاتنی گەشتیار سەیرانگاکە پاکدەکەنەوە.
سەروەر عەبدوڵا سەرۆک شارەوانی گەرمک بە 964ی وت، ئەمڕۆ تەواوی خۆڵ و خاشاکی ناو سەیرانگای گۆڵێیان پاککردوەتەوە و لە چەند رۆژی داهاتووشدا حاویەیی ئاسنی بۆ دابین دەکەن، کرێکارێکی تایبەتیان داناوە بۆ رێگای گۆڵێ تاوەکو رێگای سەیرانگاکەش پاک بکاتەوە.
پێشتر حاویەی پلاستیکی لە گۆڵێ هەبووە، بەڵام سەرکەوتوو نەبووە و لەبەر ئەوە لە چەند رۆژی داهاتوودا حاویەیی ئاسنی باش دائەنێن بۆ ئەوەی ئەگەر ئاگریشی تێدا بکەنەوە کێشەی بۆ دروست نەبێت، سەروەر عەبدوڵا وای وت.
گۆڵێ سەیرانگایەکی تایبەتی پێنجوێنە و کەوتووەتە قەزای گەرمک، ئاو لە چەند بەردێکەوە دێتە خوارەوە و نزیکەی 45 دەقە دوورە لە سەنتەری قەزاکەوە.
پێداچوونەوە: محەمەد فاتیح
