راپەڕینی 1991
ئەو رۆژەی قەزای سۆران ناوەکەی گۆڕدرا
+964
ئاکام غەفور-سۆران
ئەمڕۆ کە ساڵڕۆژی راپەڕینی ئیدارەی سۆرانە، یەکەم دەستکەوتی راپەڕینی ناوچەکەش گۆڕینی ناوی قەزای سدیق بوو بۆ سۆران.
لە ساڵی 1980 رژێمی بەعس ناوی قەزایەکە دەکاتە قەزای سدیق، خەڵکی ناوچەکەش دەڵێن، ئەوە بەشێک بوو لە سڕینەوەی مۆرکی نەتەوەیی و زمانی کوردی.
حاجی جەعفەر، بەشداربوویەکی راپەڕینە، بۆ 964 دەڵێت، “لەگەڵ راپەڕین دەستبەجێ ناوی قەزایەکەمان گۆڕی بۆ سۆران، ناوچەکە ناوچەیەکی سۆرانینشینە، هەر ئەوەش هۆکار بوو بۆ دیاریکردنی ناوی سۆران”.
مامۆستا سامی دەعۆ، کەسوکاری شەهیدانی راپەڕینی سۆرانە، بە 964ـی وت، “رژێمی بەعس جگە لە داگیرکاری وڵات هەوڵیداوە کولتوور و زمان و فەرهەنگیش داگیر بکات، کە بنەما و ناسنامەی نەتەوە زمانە، رژێمی بەعس ناوە کوردییەکانی دەگۆڕی بۆ ناوی عەرەبی”.
وەک باسی دەکات، راپەڕین هۆکار بووە بۆ دووبارە بەکارهێنانەوەی وشەی کوردی و گۆڕینی ناوەکان بۆ ناوی کوردی.
لە 10ـی ئاداری ساڵی 1991 خەڵکی سۆران و قەزا و ناحیە و گوندەکانی دەوروبەری راپەڕین دژی رژێمی بەعس و هەر ئەو رۆژەش ناوچەکە لەو رژێمە پاککرایەوە.
پێداچوونەوە: ئەرسەلان عەبدوڵا
