بەراورد بە هەفتەکانی پێشوو بەڕێژەی 40٪ زیادیکردووە
لە یەکەم هەفتەی مانگی رەمەزاندا نزیکەی نۆ تۆن زبڵ لە عەلوەی هەولێر کۆکرایەوە
964+
شۆڕش قادری
بەڕێوەبەرایەتی خزمەتگوزاری و ژینگەپارێزی هەولێر هەموو هەفتەیەک عەلوەی سەوزە و میوەی شارەکە پاک دەکاتەوە و ئەم هەفتەیەش، بەهۆی مانگی رەمەزان، زبڵی ئەو شوێنە 40٪ زیادیکردووە، جگە لەپاککردنەوەی عەلوە، سەر و بنی پردەکانیشی خاوێن کردەوە.
بەمەبەستی پاک راگرتنی ژینگەی ناو گومرگی سەوزە و میوە، هەموو شەوانی پێنجشەممە، بە سوود وەرگرتن لەچۆڵبوونی شەقامەکان لەو کاتانەدا، خۆڵ و خاشاکی کۆڵان و شەقامەکانی عەلوەی کۆنی سەوزە و مێوەی هەولێر، بە شۆفڵ و ئامێرەکانی پاککەرەوە لادەبرێت و دواتر بە تانکەری ئاو، شوێنەکە پوخت و خاوێن دەشۆردرێت.
ژیار جەلال بەڕێوەبەری ژینگەپارێزی هەولێر بە 964ـی وت، “ئەم هەفتەیە، جگە لە پاککردنەوەی گومرگی سەوزە و میوە، لە هەڵمەتێکی دیکەدا، سەر پرد و ژێر پردی پەرینەوەی ناو شاری هەولێر پاککراونەتەوە، کە رۆژانە هاوڵاتیانێکی زۆر بەکاری دەهێنن، بۆ پەرینەوە لە شەقامە سەرەکییەکانی ناو شار”.
ئاماژەی بەوەشکرد، ئەم هەفتەیە رێژەی خۆڵ و خاشاک لە عەلوە بەهۆی مانگی رەمەزان و خواستی زۆر لە سەوزە و میوە، بەڕێژەی 40٪ زیادیکردووە.
بەقسەی ژیار جەلال پێشتر هەر هەفتەیەک، پێنج بۆ شەش تۆن خۆڵ و خاشاک لە عەلوە کۆکراوەتەوە، بەڵام ئەم هەفتەیە نزیکەی نۆ تۆن کۆکراوەتەوە و براوە بۆ زبڵخانەی کانی قڕژاڵە.
هەموو رۆژێک پێنج تۆن زبڵ لە عەلوەی هەولێر هەڵدەگیرێتەوە
