"کێشەی کۆنیان هەبووە"
لە ناحیەی کەڵەک سێ تەقەکەر دەستگیر کران
964+
شۆڕش قادری
لە ناحیەی کەڵەکـی سەربە قەزای بەردەڕەش سێ کەس دەستگیر کران کە کێشەی کۆنیان هەبووە و تەقەیان لە یەکتر کردووە.
عیماد حوسێن زێباری وتەبێژی پۆلیسی ئاکرێ بە 964ـی وت، “نزیکەی دوو مانگ لەمەوبەر لە ناحیەی کەڵەک شەڕ و دەمەقاڵێ لە نێوان دوو گەنج دروستبووە و دواتر بە سوڵح و گفتوگۆ کێشەکەیان چارەسەر کردووە، دوێنێ شەممە 22.2.2025 گەنجەکانی ئەو دوو بنەماڵەیە دووبارە شەڕیان بووەتەوە و تەقەیان لە یەکتر کردووە، بەڵام کەس بریندار نەبووە”.
“دوای رووداوی تەقەکردنەکە، پۆلیسی ناحیەی کەڵەک دەستی بە لێکۆڵینەوە کردووە و توانیویەتی بە هاوکاری بنکەی پۆلیسی فریاکەوتن و پۆلیسی چالاکییە مەدەنییەکان و ئاسایشی بەردەڕەش، سێ تۆمەتبار دەستگیر بکەن”، عیماد حوسێن وای وت.
ئاشکراشیکرد، ئەو سێ تۆمەتبارە بریتین لە (ل، ک، ا) تەمەن 32 ساڵ و (ر، س،ن) تەمەن 34 ساڵ و (س، ف، ی) تەمەن 26 ساڵ کە هەر سێکیان دانیشتووی ناحیەی کەڵەکن.
بەقسەی وتەبێژی پۆلیسی ئاکرێ، لەئێستادا هەر سێ تۆمەتبارەکە بەپێی ماددەی 15 لە یاسای نوێی چەک راگیراون و لێکۆڵینەوە لەگەڵیان بەردەوامە.
لە گوندێکی بەردەڕەش لەسەر کێشەی ئاو چوار کەس بریندار بوون
