کێڵگەیەکى نەوت لە هەرێمی کوردستان _ وێنە: ئاژانسەکان
هەوڵەکانى وەزارەتى نەوتى عێراق بێ ئەنجام بوون
“گرێبەستى کۆمپانیا نەوتییەکانى هەرێم یاسایین”
964+
وریا فەتاح
دادگاى پێداچوونەوەى عێراق، جەختیکردەوە کە گرێبەستەکانى وەزارەتى سامانە سروشتییەکانى هەرێم لەگەڵ کۆمپانیا نەوتییەکان یاسایین و هەوڵەکانى وەزارەتى نەوتى عێراق، بەبێ ئەنجام مانەوە.
وەزارەتى سامانە سروشتییەکانى هەرێم بڵاوى کردەوە، دوای چەندین دانیشتنی دادگا و تانەلێدانی وەزارەتی سامانە سروشتییەکان لە بڕیارەکانی دادگای کەرخ، کە دوابەدوای بڕیارەکانی دادگای باڵای فیدراڵی عێراق دژ بە یاسای نەوت و گازی کوردستان دەرچووبوو، دادگای کەرخ دوای ماوەیەکی زۆر لە چەندین جار دادبینی لە بەرژەوەندی وەزارەتی سامانە سروشتییەکان بڕیاری هەڵوەشانەوەی بڕیارەکانی پێشووی خۆی دا.
وەزارەتى سامانە سروشتییەکان باسى لەوەشکردووە، هەرچەندە وەزارەتی نەوتی عێراقی فیدراڵ دووبارە تانەی لە بڕیارەکان دا، بەڵام دادگای پێداچوونەوەی عێراق بڕیاری دایەوە بە پەسەندکردنی بڕیارەکانی دادگای تێهەڵچوونەوەی کەرخ.
دەشڵێت: لە رووی یاساییەوە یەکلابووەوە کە گرێبەستەکانی نێوان وەزارەتی سامانە سروشتییەکان و کۆمپانیاکانی نەوت و غاز لە هەرێمی کوردستان کارا و دروستن.