خەڵکی رۆژئاوایە
بەهۆی تۆپبارانی تورکیاوە کرێکارێک لە سنووری ئامێدی بریندار بوو
964+
هیڤی دێوالی-دهۆک
لە گوندی سەرگەلێ بەهۆی تۆپبارانی تورکیا و هێرشەکانیان بۆ سەر هێزەکانی پارتی ک*رێک*ارانی کوردستانەوە، کرێکارێکی کارگەی کۆنکیرت و قیر بریندار بوو.
ئەمڕۆ چوارشەممە 2024.12.31، سەرچاوەیەکی ئەمنی لە سنووری قەزای ئامێدی بە 964ـی وت، کەمێک پێش ئێستا لە گوندی سەرگەلێ لە سنووری قەزای ئامێدی، بەهۆی تۆپباران و شەڕی نێوان تورکیا و پە*کە*کە، کرێکارێکی کارگەی کۆنکیرت و قێر بریندار بوو.
وتیشی، بریندارەکە کوردی خەڵکی رۆژئاوای کوردستانە و رەوانەی فریاکەوتنی نەخۆشخانەی ئامێدی کرا و چارەسەری بۆ دەکرێت .
باس لەوەش کرد، کرێکارەکە پیشەی “شێف و پاسەوانە” لە کارگەکە و تەمەنی نێوان 25 بۆ 27 ساڵە و خێزانداریشە .
مەسعود بۆتی، جێگری بەڕێوەبەری تەندروستیی ئامێدی لە بارەی بریندارەکە بە 964ی وت، کرێکارەکە کوردی رۆژئاوایە و تەمەنی 35 ساڵە و ئێستا چارەسەری وەردەگرێت، ساچمەیەک بەر پێی چەپی کەوتەوە.
چەند رۆژێکە لە سنووری قەزای ئامێدی بە بەردەوامی شەڕەتەقە و تۆپبارانکردن هەیە.
پێداچوونەوە؛ ئەرسەلان عەبدوڵا
