لە رووداوێکی تەقەکردن گەنجێکی 36 ساڵ گیانی لەدەستدا
+964
گۆڤەند فەتاح – کۆیە
نزیک کاتژمێر 8ی ئەمشەو یەکشەممە 2024.12.15، لە ئەنجامی رووداوێکی تەقەکردن لە گەڕەکی هەیبەتسوڵتانی قەزای کۆیە، گەنجێکی تەمەن 36 ساڵ، فیشەکێک بەر سەری كەوتووە و گیانی لەدەستداوە.
نەشئەت ئەحمەد، لێپرسراوی بەشی فریاکەوتنی نەخۆشخانەی شەهید د. خالید، بە 964ی وت، کەمێک پێش ئێستا گەنجەكە بە برینداری هێنرایە بەشی فریاکەوتن کە فیشەکێک بەر سەری کەوتبوو، دوای هەوڵێکی زۆری تیمەکانمان بۆ چارەسەرکردنی، بەڵام بە هۆی سەختی برینەکەیەوە گیانی لە دەست دا و رەوانەی پزیشکی دادی کۆیە کرا.
964 لە سەرچاوەیەكی پۆلیسی كۆیەوە زانیویەتی، هۆکاری ئەنجامدانی رووداوەکە کێشەیەکی کۆمەڵایەتییە و کەسی کوژراو دوژمندار بووە، لێکۆڵینەوەکانی پۆلیسی کۆیەش بەردەوامن لە وردەکاری کوشتن و هۆکاری ئەنجامدانی رووداوەکە.
پێداچوونەوە: ئەرسەلان عەبدوڵا
