دیمەنی رانیە لە ئاسمانەوە. فۆتۆ: سۆشیاڵ میدیا
بەهۆی سەرپێچی کردنیان
لە رانیە تەنیا لە یەک گەڕەک کارەبای 10 ماڵ بڕدرا
964+
ژێوار خدر
بەڕێوەبەرایەتی کارەبای راپەڕین هەڵمەتێکی دەسپێکردووە بۆ پشکنینی تۆڕەکانی کارەبای قەزای رانیە، لە هەڵمەتەکەدا هەر جارە و گەڕەکێکی قەزاکە دەپشکنێت و تەنیا لە یەک گەڕەکی ئەو قەزایە 10 سەرپێچی کارەبای هاوڵاتییان تۆمارکردووە و کارەباکەیان بڕیون.
بەڕێوەبەرایەتی کارەبای راپەڕین لە راگەیاندراوێکدا رایگەیاند، تیمەکانی سەرپێچی لەهۆبەی چاککردنەوەی تۆڕەکانی کارەبای رانیەی 1، هەڵمەتێکی گەڕان و پشکنینیان دەستپێکردووە لە گەڕەکی بیتوێن سیتی و لە هەڵمەتەکەدا 10 سەرپێچییان تۆمار کردووە، کە کراونەتە سەر تۆڕەکانی کارەبا و بێ هاوبەشی کردن کارەبایان راکێشاوە.
عەلی محەمەد، بەڕیوەبەری کارەبای راپەڕین بە 964ـی وت، سزای سەرپێچیکردن، جگە لە بڕینی کارەبای سەرپێچێکار 60 هەزار دینارە، ئەگەر ماڵ بێت، بۆ دوکان 100 هەزار دینار و بۆ باخ و بیر و کارگەکانیش سزاکەی 200 هەزار دینارە.
روونیشیکردەوە، ئەو کەسانە بی کارەبا دەبن، تا ئەو کاتەی دێن و بەشێوەی یاسایی لە بەڕیوەبەرایەتییەکەمان خۆیان تۆمار دەکەن، هەرکەسێکیش سەرپێچییەکە دووبارە بکاتەوە دەدرێتە دادگا.
