لە عێراق و كوردستان پرۆسەی سەرژمێریی گشتی دەستیپێكرد

ئەرسەلان عەبدوڵا

پەیامنێرانی 964 زانیاریی ئەوەیان بە ژووری هەواڵ گەیاند، كە لە بەشێك لە شارەكانی هەرێمی كوردستان و عێراق پرۆسەی سەرژمێریی گشتی دەستیپێكرد.

پرۆسەكە لە شارەكانی عێراقیش بە مەیدانی دەستیپێكرد و تیمەكانی سەرژمێری دەستیان بە سەردانەكان كردووە بۆ تۆماركردن و وەرگرتنی زانیاری لەسەر هاوڵاتیان.

پرۆسەی سەرژمێری گشتی لەم قۆناغەیدا دوو رۆژ دەخایەنێت، كە پرۆسەی سەرەكییە و دواتر بڕیارە قۆناغی دیكەش لە پرۆسەكەدا بەڕێوەبچێت، كە پرسیارە جیاوازەكان لە هاوڵاتیان دەكرێت.

پرۆسەی تۆماركردنی خێزانەكان لە 17ی ئەم مانگەوە لە هەرێمی كوردستان بە فەرمی دەستیپێكردووە و ئەمڕۆ و سبەی دووپاتی زانیارییەكان دەكرێتەوە.

سەرژمێریی گشتی لەوەتەی 1997ـەوە لە عێراق نەكراوە و لە هەرێمی كوردستانیش لەوەتەی 1987ـەوە ئەنجام نەدراوە.