وێستگەیەکی کارەبا لە چەمچەماڵ - وێنە: پەیجی کارەبای سلێمانی لە فەیسبووک
لە سنووری قەزای چەمچەماڵ
ئەوانەی زیادەڕۆییان بۆ سەر کارەبا کردووە لێپێچینەوەیان لەگەڵ دەکرێ
+964
ژیوار خدر
لەدوای ئەنجامدانی کۆبوونەوەیەک لەنێوان قایمقامی قەزای چەمچەماڵ و بەڕێوەبەری ناحیەی ئاغجەلەر، بڕیاردرا هەرکەسێک سەرپێچی کردبێت و زیادەڕۆیی لەسەر تۆڕی کارەبا کردبیت، رووبەڕووی یاسا بکرێتەوە.
ئەمڕۆ پێنجشەممە 7.11.2024، قایمقامیەتی قەزای چەمچەماڵ رایگەیاند، لە کۆبوونەوەی ئەمڕۆی رەمک رەمەزان، قایمقامی قەزاکە و بەڕێوەبەری ناحیەی ئاغجەلەر هێمن بەهجەت ئاغجەلەر، لەگەڵ تیمێکی بەڕێوەبەرایەتیی دابەشکردنی کارەبای سلێمانی، باس لە بابەتی زیادەڕۆیی کردن بۆ سەر تاوەر و هێڵەکانی کارەبا کراوە لە سنوری ناحیەی ئاغجەلەر، بڕیاریش دراوە بەپێی یاسا مامەڵە لەگەڵ سەرپێچیکاران بکرێت و رووبەڕووی یاسا بکرێنەوە.
روونیشیکردووەتەوە، قایمقام داوا لە ئەنجومەنی گوندەکان و گوندنشینانی سنووری قەزای چەمچەماڵ دەکات، لە کاتی بینینی هەر زیادەڕۆییەک بۆ سەر تاوەر و هێڵەکانی کارەبا، هێزە ئەمنییەکان و ئیدارەی قەزای چەمچەماڵ و ناحیەکان ئاگادار بکەنەوە، بە مەبەستی بەدواداچوون و گرتنەبەری رێکاری پێویست بەرامبەر سەرپێچیکاران.
