لۆگۆی سەرژمێری دانیشتووان
لە دەرەوەی عێراقیش ئەنجام دەدرێت
کوردانی تاراوگە پێویست ناکا بۆ سەرژمێری بگەڕێنەوە
+964
ژێوار خدر
بڕیارە لە 20.11.2024، پرۆسەی سەرژمێری لە عێراق و هەرێمی کوردستان بەڕێوەبچێت، ئێستا بەشیوەیەکی ئەزموونی پڕۆسەی گەمارۆسازی و ناونوسین دەستیپێکردووە و کوردانی دەرەوەی وڵاتیش دەیانەوێت بزانن پێویست دەکات لە کاتی پڕۆسەکە ئامادە بن یان نا.
دڵزار حەمە، بەڕێوەبەری ئاماری هەولێر بە 964ـی وت، ئێستا ئێمە لە قۆناعی ژمارەدانانین، دوای تەواو بوونی ئەم قۆناغە لە بەرواری 20.11 فۆڕمی خێزان پڕ دەکرێتەوە، لەکاتی پڕکردنەوەی فۆڕمەکە ئەوانەی کە لە کاتی قۆناغی ژمارەدانان ناویان نووسراوە، ئەگەر لە کاتی پڕ کردنەوەی فۆرمەکە ئامادەش نەبن تەنیا بەڵگەنامەکانیان لە ماڵدا هەبێت، تۆمار دەکرێن و کێشەیان بۆ دروست نابێت.
وتیشی، ئەو بەڵگەنامانەی کە پێویستن بۆ ئەنجامدانی سەرژمێرییەکە هەرکام لە رەگەزنامەی عێراقی، کارتی نیشتیمانی یان پاسپۆرت دەتواندرێت بەکاربهێندرێت و کێشەی نیە.
سەبارەت بەوەی کوردانی دەرەوەی وڵات، چۆن مامەڵەیان لەگەڵ دەکرێت لە کاتی پڕۆسەی سەرژمێریەکە، کارزان مەنتک بەڕێوەبەری راگەیاندنی وەزارەتی پلاندانان بۆ 964 وتی، سەرژمێری ئەم قۆناغە تایبەتە بە دانیشتووانی هەمیشەیی ناو خاکی عێراق، هەر کەسێک کە لە دەرەوەی وڵات دەژی، توانی ئامادە بێت لەم مانگە و مانگی 11، دەتوانێت خۆی تۆمار بکات و رێگری تێدا ناکرێت، بەڵام پێوست ناکات بەتەیابەت لەبەرئەو پرۆسەیە بگەڕێنەوە ، چونکە قۆناغی سەرژمێری دەرەوەی عێراقیش لە پلاندا هەیە دوای تەواو بوونی ئەم پرۆسەیە جێبەجێ دەکرێت.
بۆ ئەو کوردانەی کە لە ناوچە جێناکۆکەکان دەژین و بەهەر هۆکارێک بێت ئێستا نیشتەجێی ناوچەیەکی جیاوازن، کارزان مەنتک وتی، گەر تا ئێستا خۆیان تۆمار نەکردبێت، کەمێک ئاستەنگی هەیە بۆ رۆژی سەرژمێری خۆیان لەسەر ماڵێک تۆمار بکەن، چونکە ئەو قۆناغە تەواو کۆتایی هاتووە لە پارێزگای کەرکوک و ناوچەی جێناکۆک، بەڵام ئەگەر بۆیان کرا هەوڵ بدەن دوو رۆژ پێش 20.11 بگەڕێنەوە ئەو ناوچانە بەڵکو پێمانبکرێت و هەوڵیان بۆ بدەین تۆمار بکرێن.
27 ساڵە لە عێراقدا پڕۆسەى سەرژمێرى ئەنجام نەدراوە و دواینجار پڕۆسەى سەرژمێرى ساڵى 1997 بوو کە ئەوکات دانیشتووانى عێراق بەبێ هەرێم 19 ملیۆن و 184 هەزار 543 کەس بوو.
یەکەم سەرژمێری گشتیى لە عێراق ساڵی 1934 ئەنجامدرا ئەوکات ژمارەی دانیشتوانەکەی سێ ملیۆن و 380 هەزار کەس بووە.
