بە هەرەوەزی سەرقاڵن
سەرمای هەورامان دروستکردنی رووبەهەناری پێشخست
964+
ئەمەل ناجی – ھەورامان
گەرچی ئەمساڵ وادەکەیان پێش خستووە، بەڵام ساڵانە لە سەرەتای مانگی یانزە دا، پیاو و ژنانی هەورامان دەست دەکەن، بە رنینی ھەنار و درووستکردنی رووبەھەنارە لە ھەورامان.
ئەمساڵ بەھۆی ھاتنی سەرماوە کەمێک کارەکەیان پێشکەوتووە و چەند رۆژێکە خاوەنباخەکان دەستیانکردووە بە رنین و داتەکاندنی ھەنار، بۆ ئەوەی کابانەکانیان رووبەھەناری لێ درووست بکەن.
ئەختەر حەمەعەلی، کابان و خانمێکی ھەورامانە بە 964ی وت، رووبەھەناری ھەورامان، دەرەجە یەکە و لەھیچ شوێنێک رکابەری نییە، بۆیە ھەموو ساڵێک، بۆ ماوەی چەند رۆژێک بەشێوەی ھەرەوەزی کۆدەبینەوە، و ئەو ھەنارانەی کە بۆ رووبەھەنار دەبن، دەیانکەین بە شەربەت و دواتریش شەربەتەکە دەکوڵێنین، تا خەست دەبێتەوە و دەبێتە رووبەھەنار.
بە وتەی ئەختەر حەمەعەلی، جگە لە رووبەھەنار، شەربەتەکە، دەکرێتە ناو فرێزەرەوە، و ھەڵدەگیرێت، و رەمەزانان سوودی لێوەردەگرن، ھەروەھا دەکرێت بە ترشیاتیش.
رووبەھەنار بە گشتی لەو ھەنارانە درووست دەکرێت، کە ترشن و بۆ خواردن نابن، دوای دەنککردنیان، دەنکە ھەنارەکان دەشێلدرێن و شەربەتەکەی دەپاڵێورێت، و دواتر لەسەر ئاگر بۆ ماوەی نزیکەی شەش کاتژمێر دەکوڵێنرێت، تا خەست دەبێتەوە.
پێداچوونەوە: ئەحمەد مستەفا
