250 ئاوارەی لوبنانی دیکە هاتنە عێراق

شۆڕش قادری

تەنیا لە ماوەی دوو رۆژدا 250 ئاوارەی لوبنانی لە فڕۆکەخانەی بەغداوە هاتوونەتە عێراق.

بەپێی راگەیەندراوێکی وەزارەتی کۆچ و کۆچبەرانی عێراق، “لە دوو رۆژی رابردوودا دوو فڕۆکە لە فڕۆکەخانەی بەغداوە چوونەتە بەیروت و 250 کەسیان لە لوبنانەوە گواستووەتەوە عێراق”.

ئاماژە بەوەشکراوە، ئەو 250 کەسە لە ترسی شەڕ و پێکدادانەکانی ئیسرائیل و حزبوڵا ئاوارە و بێ ماڵ و حاڵ بوون و دوای گەیشتنیان بە فڕۆکەخانەی بەغدا بە سەر ناوچەکانی عێراق دابەش کراون.

پێشتریش چەند خێزانێکی ئاوارەی لوبنان هاتوونەتە عێراق و رۆژى 26.9.2024، بەهۆى گرژییەکانى نێوان لوبنان و ئیسرائیل، یەکەم خێزانی پەنابەری لوبنانی کە لە چوار کەس پێکهاتبوون، گەیشتنە شارى کوت و لەلایەن محەمەد مەیاحى پارێزگارى واستەوە پێشوازییان لێکرا.