رووخاندنى خانوویەکى زێدەڕۆ لە رانیە...وێنە: پۆلیسى راپەڕین
"دەیانویست سود لە هەڵبژاردن ببینن"
پۆلیسى راپەڕین خانوویەکى زێدەڕۆیان رووخاند
964+
وریا فەتاح
پۆلیسى راپەڕین بڵاوى کردەوە کە مەفرەزەکانیان لە بەشى پۆلیسى شارەوانى خانوویەکى زێدەڕۆیان رووخاند، دەشڵێت: خاوەنەکەى دەیویست سود لە هەڵبژاردن وەربگرێت بۆ دروستکردنى خانوەکەى.
وەک ئەوەى پۆلیس بڵاوى کردووەتەوە، بەهۆى ئەوەى هێزەکی=انیان سەرقاڵى پڕۆسەى هەڵبژاردنن، خەڵکانێکى هەلپەرست بە هەلى دەزانن زیادەڕۆیى بکەنە سەر موڵک و ماڵى گشتى و خانوو بە زێدەڕۆیى دروست بکەن.
روونیشى کردووەتەوە، شەوى 10.10.2024، هێزەکانیان لە بەشى پۆلیسى شارەوانى راپەڕین دوای گەڕان و بەدواداچوون خانوویەکى هەیکەلیان دەستنیشان کرد کە بە زێدەڕۆیى دروستکرابوو، بەیانى رۆژى 11ـى مانگ هێزەکانیان بۆ رووخاندنى چووبوون دەرکەوت تۆمەتبار شەوەکەى سەقفى بەستووە و کۆنکرێتیان کردووە.
“دواى گەیشتنى هێزەکانمان خانووەکە بە ئامێرەکانى شارەوانى رانیە رووخێندرا و تۆمەتباران بۆ شوێنێکى نادیار رایان کردووە، بەڵام لێکۆڵینەوە بەردەوامە”، پۆلیسى راپەڕین وادەڵێت.
