نرخی نەوت زیاترە لە 77 دۆلار

964+

توانا نەقی

دواى هێرشە موشەکییەکەی ئێران بۆ سەر ئیسرائیل، هەفتەی رابردوو نرخی نەوت بەشێوەیکی بەرچاو بەرزبووەوە، بەڵام چەند رۆژێکە رووی لە دابەزین کردووە و رۆژانە نرخی هەر بەرمیلێک نەوت دوو بۆ سێ دۆلار دادەبەزێت.

بۆ ئەمڕۆ پێنجشەمممە تا ڕادەیەک نرخی نەوت جێگیر بووە و نرخەکان لە دوێنێوە نزیکە و بە چەند سەنتێك جیاوازییان هەیە.

نرخى هەر بەرمیلێک نەوتى برێنت بە 77 دۆلار و 17 سەنیت مامەڵەی پێو دەکرێت، هاوكات به‌رمیلێك نرخی نه‌وتی خاوی رۆژئاوای تێكساسی ئه‌مریكا بە 73 دۆلار و 85 سەنت مامەڵەی پێودەکرێت.

هەفتەى رابردوو نرخی نەوتی برێنت بە رێژەى زیاتر لە 8% و تێکساس بە رێژەى زیاتر لە 9%، بەرزبوونەوە.

گرژیی و ئاڵۆزییەکانى ناوچەکە لە لوبنان و یەمەن و هێرشى مووشەکيى ئێران بۆ سەر ئیسرائیل و ئەگەری هێرشی تەلئەبیب بۆ بە ئامانجگرتنی ژێرخانی ئابووری و دامەزراوە نەوتییەکانی تاران، دۆخێکى ناجێگیریان لە ناوچەکە دروستکردووە و هۆکارن لەسەر بەرزی و نزميی نرخی نەوت.