"بە فڕۆکەی ئێف16"
ژمارەیەک چەکداری رێکخراوی داعش لە سنووری خورماتوو کوژران
964+
سیروان خورشید – دوزخورماتوو
کاتژمێر 12:00ـی شەوی رابردوو لە سنوری هەر یەک لە گوندەکانی پەڵکانە و شۆراو، لەرۆژهەڵاتی خورماتوو، چەند مۆڵگەیەکی چەکدارانی داعش، بە فڕۆکەى ئێف16بۆردومان کران و ژمارەیەک چەکداریش کوژران.
محەمەد عەبدوڵا، بەرپرسی بەشی راگەیاندنی پۆلیسی گشتیی خورماتوو بە 964ـی وت،”لەسەر بنەمای زانیاری ھەواڵگری شوێنی ئەو چەکدارانە دیاریکراوە و بەھاوبەشی لەگەڵ ھێزی ئاسمانی عێراق و فەرماندەی ئۆپەراسیۆنە ھاوبەشەکان توانرا مۆڵگەکانی چەکدارانی داعش بۆردومان بکرێت، لە نێوان هەر یەک لە گوندەکانی شۆرا و پەڵکانەی سنووری رۆژهەڵاتی خورماتوو.
وتیشی، “لە بۆردومانەکەدا ژمارەیەک چەکداری داعش کوژران و کەرەستەی تەکنیکی و خۆراکی چەکداران لەناو مۆڵگەکان لەناوبران و خاپورکراون”.
سنووری گوندەکانی پەڵکانە و شۆراو بەدووری نزیکەی 15کیلۆمەتر دەکەوێتە رۆژهەڵاتی قەزای خورماتوو و دەکەوێتە ناوچە بۆشاییە ئەمنییەکانى نێوان سوپاى عێراق و هێزى پێشمەرگە، ناوە ناوە کێوماڵ و ئۆپەراسیۆنی ھێزە ئەمنیی و سەربازییەکان ئەنجام دەدرێت بۆ نەھێشتنی چەکدارانی داعش.
پێداچوونەوە: توانا نەقی
