شاندێكی باڵای ئابووریی عێراق گەیشتنە هەولێر، فۆتۆ: فەرمانگەی میدیا و زانیاری
سبەی كۆبوونەوە هەیە
جێگری سەرۆك وەزیران و وەزیری دارایی عێراق گەیشتنە هەولێر
964+
ئەرسەلان عەبدوڵا
ئەم ئێوارەیە شاندێكی باڵای حكومەتی عێراق گەیشتنە هەولێر، كە جێگری سەرۆك وەزیران و وەزیری دارایی لە ئەندامانی شاندەكەن.
فەرمانگەی میدیای و زانیاریی سەر بە حكومەتی هەرێم، هەواڵەكەی بڵاوكردەوە و ئاماژە بەوەی داوە، شاندی باڵای دارایی حکومەتی فیدراڵی بۆ هەولێر، بە سەرۆکایەتیی فوئاد حوسێن، جێگری سەرۆک وەزیرانی عێراق بۆ کاروباری ئابووری و تەیف سامی، وەزیری دارایی عێراق هاتوون.
هەروەها بە پێی زانیارییەكانی 964 شاندەكە ژمارەیەك بەرپرسی دیكەی ئەنجومەنی ئابووریی عێراق و پارێزگاری بانكی ناوەندی لەخۆگرتووە.
بڕیارە سبەی شاندەكە لەگەڵ بەرپرسانی باڵای هەرێمی كوردستان كۆببنەوە.
میدیای نزیك لە حكومەتی هەرێمی كوردستان بڵاویان كردەوە، سبەی کۆبوونەوەكانی ئەنجومەنی وەزاریی ئابووریی عێراق و ئەنجومەنی ئابووریی هەرێمی کوردستان دەستپێدەكات و دوو رۆژ دەخایەنێت، كە بڕیارە گفتوگۆ لە بارەی چارەسەركردنی کێشە هەڵپەسێردراوەکانی نێوان هەردوولا بە پێی دەستوور بکەن، بە تایبەتی بابەتی بودجە و موچەی فەرمانبەران و شایستە داراییەكانی هەرێمی كوردستان.
