زیاتر لە چوار هەزار مەتر بەرزە
شەش شاخەوانى کورد گەیشتنە بەرزترین لوتکە چیاى وڵاتى ئەرمەنستان
964+
وریا فەتاح
شەش شاخەوانی کورد گەیشتنە لوتکە شاخێکی بەرز لە قەفقازیای باشوور لە وڵاتى ئەرمەنستان کە چوار هەزار و 90 مەتر لە ئاستى رووى دەریاوە بەرزە.
محەمەد چاوشین، بەرپرسی راگەیاندنى فیدراسیۆنى شاخەوانى کوردستان بە 964ـى وت،”لە گەشتێکی شاخەوانیی دوورودرێژدا بۆ دەرەوەی هەرێمی کوردستان، توانیمان بە سەلامەت و سەرکەوتووانە، دواى 13 کاتژمێر بگەینە لوتکە چیای ئاراگاتس کە بەرزترین چیایە لە وڵاتى ئەرمینیا”.
“شاخەوانەکان کە ژمارەیان شەش کەس بووە رۆژى سێشەممە، 27ـى ئابى 2024، گەیشتوونەتە لوتکەکە و دواتر بە سەلامەت گەڕاونەتەوە یەریڤانى پایتەخت”، محەمەد چاوشین واى وت و خۆیشى یەکێک بووە لەو شاخەوانانە.
روونیشى کردەوە، ئەو شوێنە مەترسى هەڵدێرانى هەبووە، بەڵام ئەو شەش شاخەوانەى بۆ شوێنەکە چوون ئەزموونیان هەبووە، بۆیە توانیویانە بە لێهاتوويى مەترسییەکان تێپەڕێنن.
“شاخەکە سەخت و سەرکەش و ئاڵۆزە، هەر شاخەوانێک بتوانێت بەو لوتکەیە بگات، وەک دەستکەوتێکى شاخەوانى بۆى هەژمار دەکرێت،” محەمەد چاوشین واى بە 964، وت.
چیای ئاراگاتس، لە چوار لوتکەی سەرەکی پێکهاتووە کە هەموویان بە دەوری یەکترەوەن و لە رووی بەرزییەوە لێک جیاوازن، بەڵام ئەو لوتکەیەى شاخەوانە کوردەکان بۆى چوون بەرزترین بووە و 4 هەزار و 90 مەتر لە ئاستى رووى دەریاوە بەرز بووە.
