دیمەنێك لە كۆبوونەوەكە، فۆتۆ: پەیجی پارێزگای دهۆك
پابەندبن
دهۆك هۆشداری بە كاندید و لیستەكانی هەڵبژاردن دەدات
+964
ئەرسەلان عەبدوڵا
لە پارێزگای دهۆک هۆشداری بە كاندید و لیستەكانی هەڵبژاردنی پەرلەمانی كوردستان دەدرێت، كاتێك بانگەشە دەستپێدەكەن، پابەندی رێنماییەکانی کۆمسیۆنی باڵای هەڵبژاردن بن.
ئەمڕۆ یەکشەممە 25.8.2024 لە پارێزگای دهۆک کۆبوونەوەیەک بە سەرپەرشتی پارێزگاری شارەكە عەلی تەتەر ئەنجامدرا و لە راگەیاندراوێكیشدا لە دوای كۆبوونەوەكە، ئامادەکارییەکانی پارێزگای دهۆک بۆ بەڕێوەچوونی پرۆسەی هەڵبژاردن و بانگەشەی هەڵبژاردن خرایەڕوو.
لە راگەیاندراوەكەدا ئاماژە بەوە كراوە، لە پارێزگای دهۆك پێویستە تەواوی لایەن و كاندیدەكان پابەندی رێنماییەکانی کۆمسیۆنی باڵای سەربەخۆی هەڵبژاردنەکانی عێراق بن كاتێك هەڵمەتی بانگەشەی هەڵبژاردن دەستپێدەكەن، بۆ ئەوەی رووێکی شارستانی نیشانی تیمەکانی چاودێرانی نێودەوڵەتی و ناوخۆییش بدەن.
بڕیارە لە 20.10.2024 هەڵبژاردنی خولی شەشەمی پەرلەمانی كوردستان بەڕێوەبچێت و مانگێك پێش ئەو رێكەوتەش، واباویشە هەڵمەتی بانگەشەی هەڵبژاردن دەستپێدەكات.
