فڕۆکەی جەنگی چەند گوندێکی قەندیلی بۆردومان کرد

+964
محەمەد عەلی ــ پشدەر

چیای کورتەک و دۆڵەبیە لە گوندی باراوە لە قەندیل بۆردومان کران، بەهۆیەوە ئاگر لە دارستانی ناوچەکە کەوتووەتەوە و ئێستاش ئاگرەکەی بەردەوامە.

شێرزاد قەندیلی، هاوڵاتییەکی گوندی یەندزێ رۆژی چوارشەممە 14.8.2014، بە 964ـی وت، شەوی رابردوو فڕۆکەی جەنگی بۆردومانی چیایی کورتەک و گوندی باراوەیان کرد لە بناری چیای قەندیل، بەوهۆیەوە ئاگر لە دارستان و پووش و پاوانی سێ گوند کەوتووەتەوە و کۆنتڕۆڵ نەکراوە.

روونیشی کردەوە بەهۆی بۆردومانەکەوە دارستان و پووش و پاوانی گوندەكانی ماخۆبزان و باراوە و گرتک، ئاگری گرتووە و زیانی زۆری بەر ژینگەی ناوچەکە گەیاندووە، چەندین دۆنم دارستانەکە سووتاوە و ئاگرەکە نەکوژاوەتەوە و بەردەوامە.

سنووری ئەم سێ گوندە بەیەکە بەستراوەتەوە، بۆیە ئاگرەکە تەشەنەی کردووە و بڵاوبووەتەوە، بەهۆی سەختی چیاکانیشەوە نەتوانراوە کۆنتڕۆڵ بکرێت و ئۆتۆمبێلی بۆ ناچێت، هەروەها تادێت ئاگرەکە زیاتر دەبێت، شێرزاد قەندیلی وای وت.

سێ جار سنوورى ماوەت بۆردومان کرا

ئەم هاوڵاتییە وتیشی، بۆردومانەکە زیانی گیانی نەبووە، بەڵام زیانی ژینگەیی هەبووە، کاتی بۆردومانکردنەکە دەنگی دەهات و ترسی زۆری بۆ گوندنشینانی ناوچەکە دروست کردبوو.

بۆزانیاری زیاتر 964 پەیوەندی بە نەهرۆ عەبدوڵا، بەڕێوەبەری ناحیەی سەنگەسەر کرد، ئەویش پشتڕاستی بۆردومانەکەی کردەوە و وتی زانیاری زیاتر لای ئاسایشە و ئەوان بەدواداچوون دەکەن.

بۆ زانیاری زیاتر پەیوەندیمان کرد بە ئاسایشی راپەڕینەوە، بەڵام ئامادە نەبوون زانیاری زیاترمان پێبدەن”.